Qyzylordada júıeli jumys júrgize almaǵan basshylarǵa qatań eskertý jasalyp, sógis jarııalandy
Oblystyq densaýlyq saqtaý basqarmasy basshysynyń baıandamasyn tyńdaǵan oblys ákimi Gúlshara Ábdiqalyqova koronovırýs indetimen kúres baǵytynda arnaıy jospar jasap, 3 kún merzimde bekitýge usynýdy tapsyrdy.
Memleket basshysy Qasym-Jomart Toqaev Úkimettiń keńeıtilgen otyrysynda el ekonomıkasynyń jalpy 1,8%-ǵa tómendegenin atap kórsetti. Oblysta jartyjyldyqtyń qorytyndysymen negizgi 6 kórsetkishtiń beseýi boıynsha tómendeý tendentsııasy oryn alǵan. Qurylys jumystary - 68,2%, ınvestıtsııa tartý - 49,5% tómendegen.
Sondaı-aq, áleýmettik mańyzy bar azyq-túlik baǵasy jyl basymen salystyrǵanda respýblıkalyq kórsetkishten joǵarylaǵan.
Aımaq basshysy áleýmettik mańyzy bar azyq-túlik baǵasy boıynsha jyl basynan beri 19 túrli taýardyń 13-iniń baǵasy óskenin atady.
«Kartop - 63, sábiz ben pııaz - 50 paıyzǵa qymbattaǵan. Qys nemese kóktemgi tapshylyq kezeń emes, naǵyz kókónistiń pisip jatqan kezinde bul ne degen sumdyq? Barlyq aýdandarda baǵa ósimine jol berilgen, sonyń ishinde Jańaqorǵanda - 7, Aral men Qyzylorda qalasynda - 6 túrli azyq-túliktiń baǵasy kóterilgen»,- dedi oblys ákimi Gúlshara Ábdiqalyqova.
Jıynda baǵany turaqtandyrý baǵytynda jiberilgen kemshilikter úshin Jańaqorǵan men Aral aýdany ákimderine qatań eskertý jarııalandy. Sondaı-aq, aımaq basshysy Qyzylorda qalasy men aýdan ákimderine kókónis jáne basqa da áleýmettik azyq-túlik baǵasyn turaqtandyrýdy, negizsiz baǵa ósimi faktileri boıynsha shara qabyldaýdy tapsyrdy.
Sonymen qatar, kórshiles oblystarǵa shyǵyp, halyqty qoljetimdi baǵadaǵy arzan ónimdermen qamtamasyz etý úshin 3 kún ýaqyt berdi.
Statıstıka boıynsha oblysta 89 623 ga kúrish egilgen. Onyń 8 492 ga kólemi - artyq. Shıeli aýdany 12 200 ga jerge kúrish ekkeni týraly esep bergenimen, naqty 14 353 ga syr marjanyn ornalastyryp, 2000 gektardan astam jerge artyq kúrish ekken. Osyǵan oraı, qazirgi ýaqytta Shıeli aýdanyndaǵy 3 sharýashylyqtyń 720 gektardan astam egilgen kúrishine sý jetpeı, kúıip ketken.
Óńir basshysy berilgen tapsyrmany merziminde oryndamaı, kúrish kólemin qoldan ulǵaıtyp, sý tapshylyǵyna ákep soqtyrǵany úshin Shıeli aýdanynyń ákimine sógis jarııalady.
Keńeıtilgen Úkimet otyrysynda ishki naryqty qamtamasyz etý úshin iske qosylǵan «Qarapaıym zattar ekonomıkasy» baǵdarlamasynyń júzege asyrylýy synǵa alyndy. Sońǵy 6 aıda oblysta baǵdarlama aıasynda quny 788,6 mln teńgeni quraıtyn 37 joba maquldanǵan.
Oblys ákimi jobanyń basym bóligi Jańaqorǵan aýdanynda júzege asyp otyrǵanyn aıtty. Keı aýdandarda áli kúnge bir joba da joqtyǵyn synǵa aldy.
«Aral aýdanynda birde-bir joba joq. Bul memlekettik baǵdarlamanyń oryndalmaǵanyn bildiredi. Muhtar Áýesuly, joǵaryda atalǵan «qatań eskertýdi» eskere kele, sizge sógis jarııalaımyn. Keleside kórsetkish taǵy tómendese, budan da qatań tártiptik jaýapkershiligińiz qaralatyn bolady. Bul barlyq basqarma basshylary men qala, aýdan ákimderine qatysty. Sondaı-aq, «Qarapaıym zattar ekonomıkasy» baǵdarlamasy aıasynda jeńildetilgen nesıelendirý boıynsha jumys kúsheıtilsin. Qyzylorda qalasy - 10 mlrd teńge, al barlyq aýdan ákimdikteri - 2 mlrd teńgege jýyq mejeni ıgerý jumysyn jalǵastyrýy tıis»,- dedi oblys ákimi.
Memleket basshysy «Jumyspen qamtý jol kartasynyń» júzege asyrylý barysynda da kóp másele bar ekenin aıtyp, turaqty jumys oryndaryn kóbeıtýdi tapsyrdy. «Jumyspen qamtý jol kartasy» aıasynda oblysqa 276 jobany júzege asyrýǵa 37 mlrd-qa jýyq qarjy bólingen. Bul qyrýar qarajat pandemııa ýaqytynda 9300 jańa jumys ornyn ashyp, halyqtyń áleýmettik jaǵdaıyn jaqsartýǵa baǵyttalyp otyr.
Búgingi tańda 276 jobanyń 270-si boıynsha jumys bastalǵan. Jol kartasy aıasynda jumys ornyn ashý kórsetkishteri Qyzylorda qalasynda - 39,4 jáne Aral aýdanyna - 46,1 paıyz.
Óńir basshysy bardyq aýdan jáne qala ákimine osy aıdyń sońyna deıin ashylǵan jańa jumys oryndaryn 50 paıyzdan asyrýdy tapsyrdy.
«Eńbek» memlekettik baǵdarlamasy aıasynda halyqty turaqty jumyspen qamtýdyń kózi - bos jumys oryndary. Birinshi jartyjyldyqta 4058 adam ǵana jumysqa ornalasqan, al jyldyq jospar - 13 900 adam bolatyn. Jospardyń úshten biri de oryndalmaǵan. Eń tómen kórsetkish Qazaly, Qarmaqshy jáne Syrdarııa aýdandarynda bolyp otyr. Sonymen qatar, jańadan ashylǵan jumys oryndarynyń sany - jyldyq jospar boıynsha 12 602 bolsa, odan 7080 oryn ǵana ashylǵan. Eń tómen kórsetkish Qyzylorda qalasynda - 23%. Nurlybek Mashbekuly, Qyzylorda qalasy árqashan da aldyńǵy qatarda bolýy tıis, jumys jasańyz»,- dedi oblys ákimi Gúlshara Ábdiqalyqova.
Prezıdent Qasym-Jomart Toqaev memlekettik-jekemenshik seriktestik jobalaryn júzege asyrý barysynda memleket mindettemelerine qatysty máseleni jan-jaqty zertteýdi tapsyrǵan bolatyn. Aımaqta memlekettik-jekemenshik áriptestik aıasynda 57 jobanyń 38-i tolyqtaı iske qosylǵan. Búgingi tańda jobalar boıynsha qabyldanǵan memlekettik mindettemelerdiń somasy - 16,5 mlrd teńge.
Aımaq basshysy bıýdjet shyǵystaryn ońtaılandyrý máselesi Prezıdenttiń tikeleı baqylaýynda bolatynyn eskertti. Sonymen qatar, «Tsıfrlyq Qazaqstan» baǵdarlamasyndaǵy barlyq kemshilikter túzelip, jyl sońyna deıin 250-den astam turǵyny bar eldimekender sapaly ınternetpen qamtylýy tıis.
«Qyzylorda oblysynda jer qatynastary boıynsha geoportaldy tolyqtyrý jumysy 10 paıyzǵa oryndalǵan. «Óńirlik geoaqparattyq júıeni» jasaý tsıfrlyq tehnologııalar basqarmasyna tapsyrylǵan bolatyn. Jumysty bastaýǵa bıýdjetten tıisti qarjy - 35 mln teńge bólingen. Geoportaldy qurýǵa memlekettik satyp alý konkýrsy jarııalanǵanymen, áli naqty tıisti jumys bastalmaǵan. Osyǵan baılanysty tsıfrlyq tehnologııalar basqarmasyna konkýrs nátıjesimen merdigerdi anyqtap, jyl sońyna deıin geoportaldy ashýdy tapsyramyn. QR Tsıfrlyq damý, ınnovatsııalar jáne aeroǵarysh ónerkásibi mınıstrligimen birlesip, jańa oqý jyly bastalar aldynda 25 tamyzǵa deıin tıisti sharalar qabyldaýǵa tıispiz»,- dedi oblys ákimi Gúlshara Ábdiqalyqova.