Qyzylordada júk kóligi jaıaý júrginshiler jolaǵynan ótip bara jatqan adamdy qaǵyp, mert qyldy
Oqıǵa 1 qyrkúıek kúni Qyzylorda qalasynyń sol jaǵalaý aýmaǵynda bolǵan. «KaMAZ» júk avtokóliginiń júrgizýshisi jaıaý júrginshilerge arnalǵan jolaqtan ótip bara jatqan jaıaý júrginshini qaǵyp ketken. Saldarynan jaıaý júrginshi oqıǵa ornynda kóz jumdy. Kináli júrgizýshi ustaldy.
«Oqıǵa boıynsha QR Qylmystyq kodeksiniń 345-babynyń 3-bóligimen sotqa deıingi tergep-tekserý áreketteri júrgizilýde. Onda kólik quralyn basqaratyn adamnyń jol júrisi nemese kólik quraldaryn paıdalaný qaǵıdalaryn buzý saldarynan abaısyzda adam ólimine ákep soǵý jaǵdaıy kórsetilgen», - dep málim etti Qyzylorda oblystyq polıtsııa departamentinen.
Vedomstvo málimetinshe, tıisti sot saraptamalary taǵaıyndalǵan. Oqıǵanyń mán-jaılary anyqtalýda.
Eske salsaq, budan buryn Qyzylordada jasóspirimdi qaǵyp, oqıǵa ornynan ketip qalǵan júrgizýshi ustaldy.