Qyzylordada jol boıynda kólik órtenip, gaz ballony jaryldy

QYZYLORDA. QazAqparat - Qyzylorda oblysynda úlken joldyń boıynda jeńil kólik tolyǵymen órtenip, onda ornatylǵan gaz ballony atyldy, dep habarlaıdy QazAqparat tilshisi.

Oqıǵa 8 tamyzda saǵat 15.40-ta «Batys Qytaı - Batys Eýropa» tasjolynyń Aqqum aýylynyń tusynda bolǵan. Sol ýaqytta tótenshe jaǵdaılar departamentine «Volga» kóligi janyp jatqany jóninde habar túsken.

«Oqıǵa ornyna №11 órt sóndirý bóliminen 1 tehnıka men 5 qyzmetker bardy. Jol boıynda 2004 jyly shyǵarylǵan jeńil kóliktiń tolyǵymen janyp ketkeni ańǵaryldy. Avtokólikke gaz ornatylǵany anyqtaldy. Órt sóndirý avtokóligi jetkenshe kólikte ornatylǵan gaz ballony atylǵan. Oqys oqıǵadan qaıtys bolǵandar jáne zardap shekkender joq», - dedi Qyzylorda oblystyq Tótenshe jaǵdaılar departamenti Órt sóndirý jáne avarııalyq-qutqarý jumystary qyzmetiniń baspasóz hatshysy Álııa Erejepova.

Vedomstvo málimetinshe, jyl basynan beri oblysta avtokólikterde 61 órt tirkelgen. Onyń 25-i Qyzylorda qalasynda tirkelse, qalǵany aýdandarda bolǵan.

Eske salsaq, budan buryn Qyzylordada páterdegi órtten es-tússiz jatqan áıel qutqaryldy.