Qyzylordada joǵalǵan azamat eki kúnnen keıin elsiz daladan tabyldy
22:17, 17 Qarasha 2021
QYZYLORDA. QazAqparat - Qyzylorda oblysynda jylqymen mal izdeýge shyqqan 36 jastaǵy azamat eki kúnnen keıin tabyldy, dep habarlaıdy QazAqparat tilshisi.
Qyzylorda qalasyna qarasty Qosshyńyraý aýyldyq okrýgine qarasty Abaı aýylyndaǵy sharýa qojalyǵynda jumys isteıtin 1984 jyly týǵan azamat 15 qarasha kúni saǵat 12.00 shamasynda mal qaraý úshin jylqy minip shyǵyp ketken.
«Syrdarııa aýdany baǵytynda jolǵa shyqqan ol sodan beri habarsyz ketip, úıge oralmaǵan. Jedel qutqarý jasaǵynan 4 qutqarýshy men 1 kınolog izdeýge kiristi. Іzdestirý sharalary barysynda ol elsiz daladan tabyldy. Tabylǵan azamat jedel járdem qyzmetine jetkizildi», - dedi oblystyq Tótenshe jaǵdaılar departamenti Órt sóndirý jáne avarııalyq-qutqarý jumystary qyzmetiniń baspasóz hatshysy Álııa Erejepova.
Eske salsaq, budan buryn mal baǵyp júrip joǵalǵan bala qoılarmen birge elsiz dalada túnegenin jazǵan edik.