Qyzylordada jastarǵa arnalǵan «Múmkindikter kerýeni» sharasy uıymdastyryldy

QYZYLORDA. QazAqparat - Qyzylorda qalasynda jastarǵa arnalǵan «Múmkindikter kerýeni» sharasy uıymdastyryldy, dep habarlaıdy QazAqparat tilshisi.

Atalǵan shara Qyzylorda qalasyna qarasty Tasbóget kentiniń ortalyq alańynda ótkizildi. Ol jastar arasyndaǵy jumyssyzdyq deńgeıin tómendetý, kásipkerlikti damytý, jastardyń suranysyndaǵy qajettilikterdi qamtamasyz etý maqsatynda qolǵa alynyp otyr.

Shara barysynda 1392 bos jumys orny usynyldy. Onda «Dıplommen aýylǵa», «2021-2025 jyldarǵa arnalǵan kásipkerlikti damytý ulttyq jobasy», «Bıznes bastaý» sekildi memlekettik baǵdarlamalar túsindirildi. Oǵan baılanysty sala mamandary, jastarǵa jáne jas otbasylarǵa turǵyn-úı alý múmkindigi boıynsha «Otbasy bank» AQ-niń, «E-gov» elektrondy qyzmet kórsetý júıesin paıdalaný boıynsha «Azamattarǵa arnalǵan úkimet» AQ mamandary keńes berdi.

Kent ortalyǵyndaǵy S. Maıqanova atyndaǵy mádenıet úıinde jastar tegin úıirme, tildik kýrstarǵa jazyldy. Sondaı-aq, aqysyz negizde advokat, sot oryndaýshylary, quqyq qorǵaý qyzmetkerleri, dárigerler kómek kórsetti. Jastarǵa arnalǵan «Jas jýrnalıster», «Jas aqyndar», «Jas modelder», «Jas akterler» kastıngteri uıymdastyryldy.

Ortalyq alańda qazaq kúresi, toǵyzqumalaq, qol kúresi, gir kóterý, asyq atý sekildi ulttyq sport túrlerinen saıystar ótkizildi. Kesh sońy gala kontsertke ulasty.