QYZYLORDA. QazAqparat - Qyzylordada jastar ortalyǵy ashyldy. Ortalyq Syrdarııanyń jańa aýmaǵy - darııanyń sol jaǵalaýynda boı kóterdi, dep habarlaıdy QazAqparat tilshisi.
Atalmysh saltanatty sharaǵa Qyzylorda oblysynyń ákimi Qyrymbek Kósherbaev qatysty. Oblys basshysy jergilikti jastardy zamanaýı resýrstyq ortalyqtyń ashylýymen quttyqtady.
«Aǵa urpaqtyń izgi isi - jastarǵa jaǵdaı jasaý. Bıyldyń ózinde aımaqta memlekettik jastar saıasatyn júzege asyrýǵa 500 mln teńgeden astam qarjy bólingen. QR Tuńǵysh Prezıdenti - Elbasy N.Nazarbaevtyń Qazaqstan halqyna Joldaýynda bıylǵy jyldy Jastar jyly dep jarııalaǵany belgili. Osyǵan oraı qosymsha qaralǵan 70 mln teńge qarjyǵa jańa bastamalar birinshi kezekte qoldaý tapty», - dedi aımaq basshysy.
Aıta keteıik, aımaq basshysynyń tapsyrmasymen resýrstyq ortalyq táýlik boıy jumys isteıdi. Jastar ortalyǵy ǵımaraty bıznestiń áleýmettik jaýapkershiligi negizinde «QazGermunaı» birikken kásiporny» JShS demeýshilik qoldaýymen paıdalanýǵa berilip otyr. Jastar ortalyǵynda IT-park, antıkafe, ınternet, kitaphana, jattyǵý zaly qarastyrylǵan jáne táýlik boıy jumys isteıtin bolady.
Sońǵy bes jylda Syr óńirinde jastar arasyndaǵy jumyssyzdyq deńgeıi turaqty tómendedi. Ekonomıkalyq belsendi jastardyń sany artty. Qazirgi tańda 510 túlek Reseı úkimetiniń grantymen Máskeý men Sankt-Peterbýrg qalalaryndaǵy ınjenerlik joǵarǵy oqý oryndarynda bilim alýda. Al 900-ge jýyq daryndy aýyl balalary oblys ákiminiń arnaıy grantymen respýblıkanyń joǵary oqý oryndarynda aımaqqa qajetti mamandyqtardy ıgerýde.
Ádiljan Úmbet
1996 jyly Ál-Farabı atyndaǵy Qazaq memlekettik ulttyq ýnıversıtetiniń jýrnalıstıka fakýltetin támamdaǵan. Eńbek jolyn 1996 jyly Almaty qalalyq «Almaty aqshamy» gazetinde bastady. Odan keıin jyldarda Qorqyt ata atyndaǵy Qyzylorda memlekettik ýnıversıtetinde, «Aqmeshit aqshamy», «Syr boıy» gazetterinde qyzmet atqaryp keledi.
2015-2020 jyldarda «Aqmeshit aptalyǵy» gazetiniń bas redaktory boldy.
Negizgi qyzmetimen qosyp 2006-2014 jyldarda respýblıkalyq «Jas Qazaq», «Alash aınasy» gazetteriniń Qyzylorda oblysyndaǵy menshikti tilshisi bolyp eńbek etti.
2018 jyldan beri «Kazinform» aqparat agenttiginde Qyzylorda oblysyndaǵy menshikti tilshi.