Qyzylordada jasóspirimdi soqqyǵa jyqqan 5 oqýshy polıtsııaǵa jetkizildi

QYZYLORDA. QazAqparat - Qyzylorda oblysynda jasóspirimdi uryp-soqqan 5 oqýshy anyqtalyp, aýdandyq polıtsııa bólimine jetkizildi, dep habarlaıdy QazAqparat tilshisi.

Áleýmettik jelide jasóspirimdi belgisiz azamattardyń uryp-soǵyp jatqany jóninde beınekórinis jarııalanǵan edi.

Osy maqsatta Qazaly aýdandyq polıtsııa bólimi qosymsha tekserý jáne áleýmettik jelilerde monıtorıng júrgizdi.

Nátıjesinde, beınerolıkte kórsetilgen kámeletke tolmaǵandy uryp-soqqan adamdar anyqtalǵan.

«Bul boıynsha Qazaly aýdany polıtsııa bóliminiń sotqa deıingi tergep tekserýdiń birińǵaı tizilimine QR Qylmystyq kodeksiniń 293-babynyń 2-bóligimen (buzaqylyq) is tirkeldi. Tergeý júrip jatyr. Tıisti saraptamalar taǵaıyndaldy. Kúdiktiler polıtsııa bólimine jetkizildi», - dep málim etti Qyzylorda oblystyq polıtsııa departamentinen.

Qazaly aýdanynyń ákimdigi tóbeleske qatysty anyqtaý sharalary júrgizilgenin habarlady.

«Kámeletke tolmaǵan balany jabylyp soqqyǵa jyqqan Áıteke bı kentindegi №266 mektep-lıtseıdiń 5 oqýshysy ekeni belgili boldy. Olar 7 sáýirde aýdandyq polıtsııa bólimine jetkizildi. Qazir soqqyǵa jyǵylǵan bala aýrýhanada em qabyldap jatyr. Jaǵdaıy birqalypty», - dep málim etti aýdan ákimdiginen.

Eske salsaq, budan buryn Qyzylordada oqýshylar tóbelesip, bireýi pyshaq jaraqatyn alǵan edi.