Qyzylordada jappaı ereýil kezinde talqandalǵan ǵımarattar 20 aqpanǵa deıin qalpyna keledi

QYZYLORDA. QazAqparat - Qyzylordada jappaı tártipsizdik saldarynan zaqymdalǵan ǵımarattardy qalpyna keltirý jumysy 20 aqpanǵa deıin aıaqtalady, dep habarlaıdy QazAqparat tilshisi.

Syr óńirinde tótenshe jaǵdaı rejımi búgin aıaqtaldy.

Oblys ákimi Gúlshara Ábdiqalyqova osy oraıda resmı málimdeme jasap, turǵyndardy saqtyq sharalaryn saqtap júrýge shaqyrdy.

Aıta ketsek, 5-6 qańtar kúnderi aımaqta jappaı narazylyq boldy. Nátıjesinde 952 adam quqyq qorǵaý organdaryna jetkizildi.

Quqyq buzý áreketteri boıynsha 56 qylmystyq is qozǵalyp, 97 adam qamaýǵa alyndy. Sondaı-aq, 436 ákimshilik is qozǵalyp, 154 adam qamaldy.

Aımaq basshysy málimdemesinde qylmys jasaǵandar zań boıynsha jaýapqa tartylatynyn aıtyp ótti.

Memleket basshysynyń tapsyrmasyna sáıkes ártúrli quqyq buzýshylyq boıynsha ustalǵan azamattardyń kinálilik deńgeıi anyqtalady.

Tergeý sharalaryn júrgizý barysynda adam quqyqtarynyń buzylýyna jol berilmeıdi.

Gúlshara Ábdiqalyqova syn sátte turǵyndardyń beıbit ómiri men qaýipsizdigin saqtaǵan sarbazdar men dárigerlerge alǵys aıtty.

«Syn saǵatta jappaı tártip buzýshylarmen kúresip, memleket tutastyǵyn saqtaýda aldyńǵy sapta turyp, azamattarymyzdyń ómiri úshin jankeshtilik tanytqan barlyq quqyq qorǵaý organdarynyń qyzmetkerlerine alǵysymyzdy aıtamyz. Antyna berik dárigerler de tótenshe jaǵdaı kezinde qyzmetterine adaldyǵyn kórsetti. Ot pen oqtyń ortasynda júrip jaralylardyń ómirin aman saqtap qalýǵa tyrysty. Bul rette barsha medıtsına qyzmetkerlerine myń alǵys!», - dedi oblys ákimi.

Aıta keteıik, qazirgi tańda óńirde kommýnaldyq qyzmetter men shaǵyn jáne orta bıznes nysandary qalypty jumys istep tur.

Óńirde qajetti azyq-túlik ónimderi men janar-jaǵarmaı qory jasaqtalǵan.

Sondaı-aq, aımaq basshysy óz málimdemesinde zaqymdalǵan ǵımarattardy qalpyna keltirý jumystary 20 aqpanǵa deıin aıaqtalatynyn málimdedi.

Oblys ákimi jerlesterin el Prezıdenti ustanǵan baǵytyn qoldap, birlik tanytýǵa shaqyrdy.

«Búlikshilermen kúres kezinde azamattardyń kópshiligi patrıottyq tanytyp, kelisim men birlikti kórsetti. Synaq kezinde birge bolǵan barsha Syr jurtyna rııasyz alǵysymyzdy bildiremiz. Halyqtyń birligimen kez kelgen qıyndyqtan shyǵamyz. El Prezıdenti Qasym-Jomart Kemeluly Toqaevtyń birlikke úndeıtin ustanymdaryna qoldaý bildireıik! Eldiń irgesi berik bolsyn! Kúshimiz birlikte», - dedi Gúlshara Ábdiqalyqova.

Eske salsaq, Qyzylordada biryńǵaı baılanys ortalyǵyna tótenshe jaǵdaı kezinde 70 myń qońyraý túsken.