Qyzylordada zańsyz oıyn bıznesin júrgizgen áıel jazaǵa tartyldy
Almatylyq azamatsha ótken jyldyń mamyr aıynda Qyzylorda qalasynda ınternet-kazıno ashyp, zańsyz oıyn bıznesin júrgizgen. Osy maqsatta oblys ortalyǵynda ornalasqan Qazybek bı kóshesiniń boıyndaǵy kóp qabatty úıden páter jaldap alǵan. Onda qoıylǵan 8 kompıýterdi ınternet jelisine qosyp, eki tanysyn kelýshilerge qyzmet kórsetýshi retinde jumysqa tartqan.
«Sot kompıýterlik-tehnıkalyq saraptamasy alynǵan kompıýterlerge «Superomatic» baǵdarlamasyn qosý arqyly onlaın oıyndar saıtyna qoljetimdilik qamtamasyz etilgenin anyqtady.
Azamatshanyń zańsyz áreketin oblystyq ekonomıkalyq tergep-tekserý departamenti qyzmetkerleri áshkereledi. Oıyn ornynan 8 kompıýterlik júıe monıtory, 3 modem, beınekamera, jelilik hap jáne kassadaǵy 23 myń teńge tárkilendi.
Esep qujattaryna júrgizilgen býhgalterlik jáne qarjy bıýdjettik zertteý negizinde zańsyz qyzmetten 8 mln 190 myń teńge paıda tapqany anyqtaldy. Bul iri mólsherge jatady.
Sot barysynda azamatsha óz kinásin tolyqtaı moıyndady», - dep málim etti Qyzylorda oblystyq ekonomıkalyq tergep-tekserý departamentinen.
Vedomstvo málimetinshe, Qyzylorda qalalyq №2 sotynyń úkimimen azamatsha QR Qylmystyq kodeksiniń 307-baby 2-bóligi 3-tarmaǵymen eki jyl merzimge bas bostandyǵyn shekteý jazasyna kesildi.
Eske salsaq, budan buryn Qyzylorda oblysynda jalǵan nesıe qujatymen eldi aldaǵan áıel sottaldy.
Foto: dreamstime.com