Qyzylordada zańsyz oıyn bıznesin uıymdastyrýshylarǵa sot úkimi shyqty

QYZYLORDA. QazAqparat - Qyzylordada zańsyz oıyn bıznesin uıymdastyrýshy eki azamatqa sot úkimi shyǵarylyp, birine 1000 AEK, ekinshisin 200 AEK kóleminde aıyppul salyndy, dep habarlaıdy QazAqparat.

Qarjylyq monıtorıng agenttiginiń málimetinshe, e ki oıyn orny boıynsha zańsyz bıznes isterin vedomstvonyń Qyzylorda oblysy boıynsha departamenti tergegen.

«O.Tsoı zańsyz oıyn mekemesin ashyp, býkmekerlik keńsesiniń atynan ǵımarat jalǵa alǵan jáne 9 derbes kompıýter alyp ınternet jelisine qosqan. Saraptama qorytyndysyna saı, jelilik bloktardy paıdalaný arqyly arnaıy baǵdarlama qoldanyp, onlaın oıyndar saıtyna kirgen. Býkmekerlik keńse ornyn asha otyryp, qyzmet kórsetetin personal retinde úsh adamdy osy zańsyz qyzmetke tartqan», - dep jazdy agenttikten.

Ekinshi azamat Q.Naýryzbaev páter jalǵa alyp, «elektrondy rýletka» oıyn qurylǵysyn ornatqan. Eki kisini kassır qyzmetine, eki kisini kúzetshi retinde jumysqa qabyldaǵan.

Sottalýshylarǵa taǵaıyndalǵan aıyppul somasyn tóleýge bir aı merzim berildi, jaltarǵan jaǵdaıda aıyppul májbúrli túrde óndiriletin bolady.