Qyzylordada zańsyz oıyn bıznesin uıymdastyrýshylar jazaǵa tartyldy
Eki oıyn ornyna qatysty zańsyz bıznes isi Qyzylorda oblysy boıynsha ekonomıkalyq tergep-tekserý departamentinde tirkelgen.
«Alǵashqy oqıǵa boıynsha O. Tsoı zańsyz oıyn mekemesin ashqan. Bul maqsatta býkmekerlik keńse atynan ǵımaratty jalǵa alǵan. Onda 9 derbes kompıýterdi ınternet jelisine qosqan. Saraptama qorytyndysynda ol jelilik bloktardy paıdalaný arqyly arnaıy baǵdarlama qoldanǵany anyqtaldy. Sol arqyly onlaın oıyndar saıtyna kirgen. Býkmekerlik keńse ornynda qyzmet kórsetetin personal retinde úsh adamdy osy zańsyz qyzmetke tartqan.
Ekinshi Q. Naýryzbaev jalǵa alǵan páterde «elektrondy rýletka» oıyn qurylǵysyn ornatqan. Eki kisini kassır qyzmetine, eki kisini kúzetshi retinde jumysqa qabyldaǵan», - dep málim etti departamentten.
Vedomstvo málimetinshe, olardyń birine 1 000, ekinshisine 200 aılyq eseptik kórsetkish kóleminde aıyppul jazasy taǵaıyndaldy.
Aıyppuldy tóleýge bir aı merzim belgilendi. Jaltarǵan jaǵdaıda aıyppul májbúrli túrde óndiriledi.
Eske salsaq, budan buryn Qyzylordada sanıtarııany saqtamaǵan ashanalarǵa 1,4 mln teńge aıyppul salyndy.