Qyzylordada Ybyraı Jaqaevtyń 130 jyldyq mereıtoıy toılandy

QYZYLORDA. QazAqparat - Qyzylorda oblysynyń Shıeli aýdanynda dıqan Ybyraı Jaqaevtyń 130 jyldyq mereıtoıyna arnalǵan merekelik shara ótkizildi, dep habarlaıdy QazAqparat tilshisi.

Atalǵan shara Ybyraı Jaqaevtyń mereıtoıyna arnalǵan teatrlandyrylǵan kórinispen bastalyp, «Altyn kúz-2021» merekesine oraı saltanatty sharaǵa ulasty. Shara barysynda sala úzdikteri marapattaldy. Aýdan ákimi Narıman Maqulbekov eseli eńbekten mol nesibege kenelgen jurtshylyqqa quttyqtaý lebizin bildirdi.

Aıtýly sharaǵa oblystyq máslıhat hatshysy Naýryzbaı Baıqadamov, Y.Jaqaevtyń uly Seıitbek Jaqaev jáne ózge de azamattar qatysty.

Mereıli mereke barysynda oblystyq máslıhat hatshysy N.Baıqadamov oblys ákiminiń quttyqtaý hatyn tabystady. Saltanatty shara barysynda eńbek úzdikterine QR Aýyl sharýashylyǵy mınıstrliginiń nagradalary, oblys ákiminiń alǵys hattary tabystaldy.

Shıeli aýdany óńirde eńbek erleriniń kóp shyǵýymen erekshelenedi. Syr óńirinen 102 Sotsıalıstik Eńbek eri shyqsa, sonyń 41-i Shıeli topyraǵynda dúnıege kelgen.

Ybyraı Jaqaev 1947 jyly kúrishtiń ár gektarynan 171 tsentnerden ónim alyp dúnıejúzilik rekord ornatty. Eńbektegi qaharmandyǵy úshin áıgili kúrish ósirýshige 1949 jáne 1971 jyldary eki ret Sotsıalıstik Eńbek eri ataǵy berildi. Ybekeń sonymen qatar, 1946 jyly KSRO Memlekettik syılyǵymen marapattaldy.

Eńbek toıymen qosa qabat Y.Jaqaevtyń 130 jyldyǵyna oraı «Jalpaq jurtqa aty málim Jaqaev» atty respýblıkalyq ǵylymı-tanymdyq konferentsııa ótkizildi. Aýyr atletıkadan respýblıkalyq týrnır uıymdastyryldy. Y. Jaqaev murajaıyna ekskýrsııalar jasalyp, jastar arasynda Jaqaevshylar qozǵalysy bastaý aldy.

«Aýdanda birqatar jobalar júzege asyrylyp, kóptegen jetistikterge qol jetkizildi. Aýdan eńbekkerleri sýdyń tapshlyǵyna qaramastan tolaıym tabyspen jetip otyr. Aýdan kúrishshileri joǵary ónimge qol jetkizidi. Jyl qorytyndysymen Shıeli aýdany oblys boıynsha egin sharýashylyǵy boıynsha oblysta «Ozat aýdan» atandy», - dedi aýdan ákimi Narıman Maqulbekov.

Aýdanda bıylǵy jyldyń 9 aıynda aýylsharýashylyǵy salasy boıynsha 25,9 mlrd teńgeniń ónimi óndirilip, ótken jyldyń tıisti kezeńimen salystyrǵanda 102,8%-ǵa artty. Bıyl 30 189,5 gektar jerge egin egildi. Negizgi daqyl 12 039 gektar kúrishtiń ár gektarynan 55 tsentnerden ónim alynyp, 66 214 tonna kúrish salysy jınalǵan.