Qyzylordada VII «Baıqońyr ınvest» forýmy bastaldy

QYZYLORDA. QazAqparat - Forým jumysy «Qyzylorda oblysynyń ınvestıtsııalyq jobalary» taqyrybynda kórmemen bastaldy. Onda forým qonaqtary Syr óńirinde júzege asyp jatqan 26 jobamen tanysty.

Álemniń 12 memleketinen jáne qazaqstandyq qarjy ınstıtýttardyń ókilderi Qyzylordanyń múmkindikterin kórdi.

Munan ári VII «Baıqońyr ınvest» ınvestıtsııalyq forýmynyń plenarlyq májilisi ótti. Jıynda Qyzylorda oblysynyń ákimi Qyrymbek Kósherbaev aımaqtyń ınvestıtsııalyq múmkindikterin aıtyp berdi.

«Bizdiń óńir - iri aýqymdaǵy jáne tehnologııa jaǵynan kúrdeli jobalardy júzege asyrýǵa qabiletti jáne senimdi seriktes. Sondyqtan qurmetti áriptester sizder óńirdiń ınvestıtsııalyq múmkindigin durys baǵalaıdy dep senemiz. Bizben birlesip, ortaq jobalardy júzege asyrýǵa qyzyǵýshylyq tanytyp otyrǵandardyń barlyǵymen biz tyǵyz jumys isteýge daıynbyz. Oblysqa kelgen ınvestorlarǵa qolaıly jaǵdaı jasaý úshin biz kúsh salýǵa daıynbyz», - dedi oblys ákimi Qyrymbek Kósherbaev.

Forým aıasynda shaǵyn jáne orta bıznesti damytý, aýylsharýashylyq ónerkásibiniń kooperatsııadaǵy bolashaǵy, memlekettik-jekemenshik áriptestiktiń jáne týrızm salasynyń damýy sııaqty máseleler talqylanatyn bolady.

Ortaq jobalardy júzege asyrý maqsatynda birqatar memorandýmdarǵa qol qoıyldy.