Qyzylordada úsh tildi meńgergen memlekettik qyzmetshiler arasynda baıqaý ótti

QYZYLORDA. QazAqparat- Qyzylordada oblystyq ishki saıasat basqarmasynyń uıymdastyrýymen úsh tildi jetik meńgergen memlekettik qyzmetshilerdi anyqtap, qoldaý maqsatynda «Til sheberi - 2016» oblystyq baıqaýy ótti. Bul týraly basqarmanyń baspasóz qyzmeti habarlady.

Baıqaýǵa Qyzylorda qalasy, Qazaly, Syrdarııa, Jańaqorǵan aýdandarynda ótken irikteý saıystarynyń jeńimpazdary, oblystyq basqarmalar men departamentiniń qyzmetkerleri, joǵarǵy jáne arnaýly orta oqý oryndarynyń stýdentteri, BAQ ókilderi qatysty.

Olar baıqaýdyń «Mádenıettanym» dep atalatyn bóliginde qazaq halqynyń salt-dástúri, dili men tili jónindegi suraqtarǵa qazaq tilinde jaýap berse, «Ulttanym» bóliginde qazaq eli tarıhy men uly tulǵalary, elimizdiń aımaqtary jónindegi suraqtarǵa orys, aǵylshyn tilderinde jaýap berdi. Al «Ónertanym» dep atalatyn bóliginde úsh tilde berilgen jańyltpashty 3 ret qaıtalap aıtýdan synǵa tústi.
Talapkerlerdiń bilimin Qorqyt Ata atyndaǵy  Qyzylorda memlekettik ýnıversıtetiniń professory, fılologııa ǵylymdarynyń doktory J.Sádýaqasuly basqarǵan qazylar alqasy baǵalady. Qorytyndysynda oblystyq jer qatynastary basqarmasynyń bas mamany Á.Amangeldıev І oryndy jeńip alsa, oblystyq memlekettik sáýlet-qurylys baqylaýy basqarmasy bas mamanynyń mindetin atqarýshy Á.Mádı ІІ oryndy, oblystyq tótenshe jaǵdaılar departamentiniń aǵa ınjeneri T.Erkebaev ІІІ oryndy ıelendi.

Júldegerler basqarma dıplomdary men eskertkish syılyqtaryn ıelendi. Jeńimpaz respýblıkalyq baıqaýǵa joldama aldy.