Qyzylordada úsh býynǵa jalǵasqan polıtseıler áýleti bar

QYZYLORDA. QazAqparat - Qyzylordada úsh býynǵa jalǵasqan polıtseıler áýleti turady. Otbasynyń bir múshesi – Baıtabyn Moldash búginde qylmystyq atqarý júıesinde qyzmet atqarady, dep habarlaıdy QazAqparat tilshisi.

23 maýsym – Polıtsııa kúni qarsańynda B. Moldashty áńgimege tartyp, óz ómir joly men aldaǵy maqsattary jóninde suraǵan edik.

- Bala kúngi armanyń qandaı edi?

- Ákem Bógenbaı – polıtsııa qyzmetkeri. Ol kisiniń jumysyna bala kezden qanyq bolyp óstim. Bul mamandyq ıeleri qoǵam tynyshtyǵyn kúzetý maqsatynda ýaqytpen sanaspaı eńbek etedi. Olardyń formasy kez kelgen jas órenniń qııalyna qanat bitirip, polıtsııa qyzmetine qyzyǵýshylyǵyn arttyra túsetini sózsiz. Eseıip, mamandyq tańdaǵan sátte polıtsııa qyzmetkeri bolatynymdy aıttym. Osylaısha quqyq qorǵaý salasyna aıaq bastym. Búginde ZK-169/4 mekemesinde rejım jáne kúzet bóliminde baqylaýshymyn.

Negizgi mindetim – sottalǵandardy alyp júrý, jumys oryndaryna aparyp, alyp kelý, sol eki aralyqta sottalǵandardyń paıdalanýǵa jáne qoldanýǵa tyıym salynǵan zattardyń alyp ótpeýin qadaǵalaý, tintý-tekserý jumystaryn júrgizý. Sondyqtan ol jumysyma jaýapkershilikpen jáne qyraǵylyqpen qaraımyn.

Ras, qyzmet atqarý barysynda talaı oqıǵa bolady. Sol sátte syr bermeı, óz jumysymdy joǵary deńgeıde atqarýǵa tyrysamyn.

- Áýletińde birneshe býynǵa jalǵasqan polıtsııa qyzmetkerleri bar eken. Sol kisiler jaıynda aıta ketseń.

- Atam Moldash Seraly ilgeride ishki ister salasynda boldy. Ákem Bógenbaı men ákemniń aǵasy Qalmurat ta kezinde quqyq qorǵaý salasynda eńbek jolyn ótkizdi.

Ákem Bógenbaı ishki ister organdarynda 40 jyl qyzmet etken. 1980 jyly eńbek jolyn Batys Qazaqstan kóliktik mılıtsııa basqarmasy Qyzylorda stantsııasynyń jelilik mılıtsııa bóliminde qatardaǵy mılıtsıoner bolyp bastaǵan. Eńbek jolynda ákem QR ІІM basqarmasynyń bastyǵy qyzmetine deıin kóterilgen. Qazir zeınet demalysynda, otstavkadaǵy polıtsııa polkovnıgi. Búginde ini-qaryndasym Saıyn men Aısara da áke jolyn jalǵap kelemiz.

- Aldyńa qoıǵan maqsatyń qandaı?

- Áýletimde birneshe býynǵa jalǵasqan quqyq qorǵaý salasynyń azamattary bar. Bul – men úshin úlken jaýapkershilik. Úlkenderden aqyl-keńes alýǵa tyrysamyn. Ol kisiler sekildi men de jasy kishilerge úlgi kórsetkim keledi. Dınastııalyq áýletten shyqqanymdy maqtan tutamyn.

- Áńgimeńe raqmet. Qyzmetińde sáttilik tileımin!