Qyzylordada úsh aýysymdyq mektep máselesi tolyq sheshildi - Kósherbaev

ASTANA. QazAqparat - Qyzylorda oblysynyń ákimi Qyrymbek Kósherbaev 2018 jyldyń 9 aıyndaǵy oblystyń áleýmettik-ekonomıkalyq damýy týraly baıandady, dep habarlaıdy QazAqparat tilshisi.

Qyzylorda oblysynda sońǵy 5 jyl ishinde 200-den astam áleýmettik nysan turǵyzylyp, paıdalanýǵa berilgen.

«2013 jyldan beri 200-den astam áleýmettik nysan pıdalanýǵa berildi, olar - bilim berý, densaýlyq saqtaý jáne mádenıet pen sport salalary boıynsha. Mysalyǵa, 57 apatty jaǵdaıdaǵy densaýlyq saqtaý mekemesiniń ornyna, 49 jańa mekeme salyndy, qalǵany 2019 jyly turǵyzylady», - dedi Qyrymbek Kósherbaev OKQ-de ótken baspasóz máslıhatynda.

Óńir basshysynyń aıtýynsha,  memlekettik bıýdjetti áleýmettik maqsatta jumsaý baǵytynda oblys sońǵy 5 jyl boıy elimizde kósh bastap keledi.

Sonymen qatar, Q.Kósherbaev oblysta úsh aýysymdyq mektep máselesi merziminen buryn sheshilgenin aıtyp ótti, sondaı-aq, 2015 jyly bastaý alǵan «Balapan» baǵdarlamasy aıasynda 3 jastan 6 jasqa deıingi balalar 100% mektepke deıingi bilim berý ortalyqtarymen qamtylǵan.

«Oblysta úsh aýysymdyq mektepterdiń problemasy tolyǵymen sheshildi. Sonymen qatar, ótken jyly apatty jaǵdaıdaǵy mektepter máselesine de núkte qoıdyq, aıta ketsem 2013 jyly oblysta 37 apatty jaǵdaıdaǵy mektep bolǵan. Bıyl Jańaqorǵan, Jalaǵash aýdandarynda apatty jaǵdaıdaǵy taǵy 2  mektep tirkeldi, ol másele búginde baqylaýda jáne tıisti sharalar júrgizilýde», - dedi oblys ákimi.

Odan bólek, búginde oblystyń 47 mektebi NZM-niń tájirıbesi men standartyna sáıkes bilim berýde, sonymen qatar bıylǵy mektep túlekteriniń 98% orta arnaýly jáne JOO-da túsken.

Eske sala ketsek, Elbasy bıylǵy halyqqa Joldaýynda Úkimetke úsh aýysymdyq mektepter máselesin tolyq sheshýdi tapsyrdy.