Qyzylordada Úrmash Túktibaevtyń bıýstiniń ashylý rásimi ótti

QYZYLORDA. QazAqparat - Qyzylorda oblysynyń Qazaly aýdanynda Keńes Odaǵynyń batyry Úrmásh Túktibaevtyń 100 jyldyǵyna arnalǵan merekelik sharalar ótti, dep habarlady QazAqparat tilshisi.

Óńirdiń  batyr esimimen atalatyn aýylynda «Erlik jyryn jyrlaımyz» atty aýdandyq jazba aqyndar músháırasy, «Máńgi jas bop júrekterde saqtaldyń» atty aýdandyq patrıottyq ánder baıqaýy, merekelik gala-kontsert uıymdastyryldy.

 Ú.Túktibaev bıýstiniń ashylý rásimine oblys ákiminiń orynbasary Rýslan Rústemov,  aýdan ákimi Najmadın Shamuratov bastaǵan el aǵalary, respýblıka kóleminde kelgen mereıtoı qonaqtary qatysty.

Batyrdyń ǵasyrlyq mereıtoıyna arnalǵan saltanatty shara teatrlandyrylǵan qoıylymmen bastaldy. R.Rústemov oblys ákiminiń quttyqtaýyn jetkizip, keshegi jahan soǵysynda Otan úshin otqa túsken qaharmandardyń bıik tulǵasyn ardaq tutyp, esimderin esten shyǵarmaý - búgingi urpaqtyń paryzy ekendigin, esimi men erligi Syr elimen birge jasap kele jatqan batyr babamyzdyń mereıtoıy Rýhanı jańǵyrýǵa ózindik ún qosatynyn aıtty.

Naqty derekterge qaraǵanda, Úrmásh Túktibaev 24 jasynda maıdanǵa attanady. Ekinshi Prıbaltıka maıdany 3-ekpindi armııa 391-atqyshtar dıvızııasy 1280-atqyshtar polki quramynda soǵysqa qatysqan ol alǵashqy kezde pýlemetshi, keıin pýlemetshiler bólimshesiniń komandıri bolady. Erligi eskerilip, «Qyzyl juldyz» ordenimen marapattalady. Perelı úshin urysta kishi serjant taısalmastan jaýdyń 20 áskerimen jeke aıqasqa túskeni týraly da derekter bar.

Munan soń qonaqtar batyr mereıtoıy qarsańynda abattandyrylǵan  «Jastar» alańymen tanysty.

Aıta keteıik, bıyl batyrdyń 100 jyldyǵy aıasynda baba atyndaǵy aýylda aýqymdy abattandyrý jumystary júrgizildi. Onyń ishinde aýyldy abattandyrý jumystaryna aýdandyq bıýdjetten 63 mln teńge, aýyldaǵy alty kósheni jóndeýge oblystyq, aýdandyq bıýdjetterden 76 mln teńge qarjy bólindi. Bólingen qarjyǵa sáıkes aýyl ortalyǵynan «Taǵzym alańy» men «Jastar» alańy jasalyp, batyr babanyń bıýsti ornatyldy.

Búgingi jastardy patrıottyqqa tárbıeleıtin ıgi sharalar  Memleket basshysynyń  Ult jospary  bes ınstıtýtsıonaldyq reformany júzege asyrý jónindegi 100 naqty qadam eńbegindegi 89-qadamda naqty aıtyldy. Onda: «Nurly bolashaq» ulttyq jobasyn ázirleý jáne júzege asyrý. Mekteptik bilim berýdiń qoldanystaǵy oqý baǵdarlamalaryna máńgilik el qundylyqtaryn engizý máselesi kóterildi. Babalar rýhyn qasterleý máńgilik el ıdeıasymen astasyp, bolashaqqa baǵdar bolyp qala bereri anyq.