Qyzylordada ýkraınalyq kúrish sorttary synaqtan ótkizilýde

QYZYLORDA. QazAqparat - Qyzylorda oblysynyń kúrish ósirýshileri aldaǵy ýaqytta Ýkraınadaǵy áriptesterimen iskerlik baılanys ornatatyn boldy, dep habarlaıdy QazAqparat tilshisi.

Ýkraına ulttyq agrarlyq ǵylymdar akademııasynyń akademıgi Nıkolaı Bezýglyı bastaǵan delegatsııa Syr óńirinde boldy. Qyzylordalyq áriptesterimen júzdesý barysynda agrarlyq saladaǵy jáne kúrish ósirý boıynsha áriptestik múmkindikter talqylandy.

Sheteldik mamandardyń aıtýynsha, Qyzylorda oblysy tabıǵı-klımattyq jaǵdaı boıynsha Ýkraınanyń kúrish ósirýshi ońtústik aımaqtarymen uqsas.

Al Syr óńiri elimiz boıynsha kúrishke qajettiliktiń 90%-yn qamtamasyz etedi. Sońǵy jyldary jergilikti sharýalar rekordtyq kórsetkishke qol jetkizip keledi. Byltyr aımaqta 500 myń tonnadan astam astyq jınaldy. Kúrish ónimdiligi gektaryna 61,8 tsentnerdi qurady. Syr kúrishi álemniń 10 eline eksporttalýda.

Byltyr Qyzylorda oblysynan Ýkraınaǵa 5,8 myń tonna kúrish jiberildi. Osylaısha eksport kólemi 1,6 mln dollardy qurady. Bıylǵy jyldyń 5 aıynda 1.5 mln. dollarǵa baǵalanǵan 4,4 myń tonna kúrish shyǵaryldy.

Ótken jyldan bastap Jalaǵash aýdanyndaǵy «Er-Áli» sharýashylyǵynda ýkraınalyq «Vıkont», «Fagot» jáne «Premıým» sorttary synamadan ótkizdi. Nátıjesi jaman emes. Kúrish ónimdiligi shamasymen gektaryna 90 tsentnerden aınaldy. Bıyl jańa suryptar 160 gektar jerge otyrǵyzyldy.

Syr óńirine sapary barysynda Nıkolaı Bezýglyı Ýkraına kúzdik bıdaıdy ósirý boıynsha kóshbasshy elderdiń úshtiginde ekenin atap ótip, bul daqyldy Qyzylordada ósirýdi usyndy.

Eske salsaq, qazalylyq dıqan tamshylatyp sýarý ádisimen mol ónim aldy.