Qyzylordada turmysy tómen otbasynyń balalary avtobýsta tegin júredi

QYZYLORDA. QazAqparat - Qyzylorda qalasynda áleýmettik jaǵdaıy tómen otbasyndaǵy oqýshylar jańa oqý jylynan bastap qoǵamdyq kólikterde tegin júredi. Olardyń jalpy sany 6800 oqýshyny quraıdy, dep habarlaıdy QazAqparat tilshisi.

Oblystyq bilim basqarmasynyń habarlaýynsha, bul maqsatta jergilikti bıýdjetten 68 mln 600 myń teńge qarjy bólindi. Igilikti bastama el Úkimetiniń 2008 jylǵy 25 qańtardaǵy №64 qaýlysymen bekitilgen áleýmettik jaǵynan qorǵalmaǵan otbasylardan shyqqan bilim alýshylarǵa qarjylaı jáne materıaldyq kómek kórsetýge bólinetin qarajatty jumsaý erejesi negizinde qolǵa alynyp otyr. Endigi kezekte sol sanatqa engizilgen jas órender qalaishilik avtobýstarda tegin qatynaı alady.

«Mundaı sanatqa memlekettik ataýly áleýmettik kómek alýǵa quqyǵy bar, memlekettik ataýly kómek almaıtyn, jan basyna shaqqandaǵy tabysy eń tómengi kúnkóris deńgeıiniń shamasynan tómen, tótenshe jaǵdaılardyń saldarynan shuǵyl járdemdi talap etetin otbasynyń balalary jatqyzylady. Sondaı-aq, oǵan jetim nemese ata-anasynyń qam­qorlyǵynsyz qalǵan, biraq otbasylarda tárbıelenip jatqan balalar, bilim berý uıymynyń alqaly bas­qarý organy aıqyndaıtyn bilim alýshylar men tárbıelenýshilerdiń ózge de sanattary engizilgen», - dep málim etti Qyzylorda oblystyq bilim basqarmasy.

Mundaı qamqorlyqqa ıe bolǵan oqýshylar qaı synypta oqıtynyna qaramastan olarǵa bir aılyq eseptik kórsetkish mólsherinde qoǵamdyq kólikte tegin júrý jeńildigi beriledi. Bul maqsatta qujat jınaý men rásimdeý isimen mektep basshylyǵy aınalysady.