Qyzylordada túrmege esirtki men telefon laqtyrmaq bolǵan eki adam ustaldy
Qyzylorda oblystyq Qylmystyq atqarý júıesi departamentine qarasty ZK-169/5 mekemesiniń óndiristik aımaǵyna sottalǵandardyń paıdalanýy men qoldanýyna tyıym salynǵan zattardy laqtyrmaq bolǵan eki azamat ustaldy. Jedel túrde mekemege Qyzylorda qalalyq Polıtsııa basqarmasynyń jedel-tergeý toby shaqyrtyldy.
«Tekserý barysynda azamattardan 20 gramdyq shprıtske nyǵyzdalyp salynǵan 10 dana ózine tán erekshe ısi bar shóp tektes zat jáne skotchpen oralǵan 3 telefon tárkilendi. Tárkilengen zat boıynsha sot-medıtsınalyq saraptama taǵaıyndaldy. Nátıjesinde onyń salmaǵy 62,02 gramm marıhýana ekeni dáleldendi. Atalǵan derek boıynsha QR Qylmystyq kodeksiniń 297-babynyń 1-bóligimen sotqa deıingi tergep-tekserý jumystary júrgizilýde», - dep málim etti Qyzylorda oblystyq Qylmystyq atqarý júıesi departamentinen.
Eske salsaq, budan buryn Qyzylordada sheńgel men sekseýildiń arasyna esirtki ósirgen aýyl turǵyny ustaldy.