Qyzylordada túrkitildes elderdiń jastary bas qosady

QYZYLORDA. QazAqparat - Syr óńirinde túrkitildes elder jastarynyń halyqaralyq festıvali ótedi. Atalmysh shara elimizdegi Jastar jyly aıasynda qolǵa alynyp otyr, dep habarlaıdy QazAqparat tilshisi.

«Túbi bir túrkiniń túpki mekeni sanalǵan Syr óńiri qashanda joǵary baǵalanady. Túrki jurtynyń ortaq abyzy - Qorqyt ata osy aımaqta máńgilik mekenin tapqan. Sondyqtan túrkitildes elder jastarynyń halyqaralyq festıvaliniń mańyzy zor. Atalmysh shara Qarmaqshy aýdany aýmaǵynda ótedi. Festıval maýsym aıyna josparlanǵan. Onyń barysynda jastar úshin mańyzdy is-sharalar júzege asatyn bolady», - dedi Qyzylorda oblystyq Jastar saıasaty basqarmasynyń basshysy Qýanysh Januzaqov.

Sondaı-aq Jastar jyly aıasynda aımaqta kóptegen ózge de sharalardy iske asyrý kózdelgen. Aqpan aıynda oblystyń barlyq aýdanynda bir ýaqytta Jastar jylynyń ashylý saltanaty ótedi. Mamyr aıynda aýyl jastarynyń oblystyq sleti bolady. Al tamyzda Aral aýdanynda lagerlerdiń respýblıkalyq sharasy ótpek. Budan bólek, respýblıkalyq stýdenttik teatrlar festıvali ashylady.

Budan buryn Qyzylordada jastarǵa qyzmet kórsetý ortalyǵy ashylatynyn habarlaǵan edik.

Eske salaıyq, bıylǵy 23 qańtar kúni Astanada Nursultan Nazarbaevtyń qatysýymen Jastar jylynyń saltanatty ashylý rásimi ótti.

Prezıdent 2019 jyldy Jastar jyly dep jarııalaýdy Qazaqstan halqyna arnaǵan Joldaýynda usynǵan bolatyn. Kóp uzamaı Elbasy Jarlyǵymen 2019 jyl Jastar jyly bolyp resmı túrde jarııalandy.