Qyzylordada Tekeı batyrdyń 350 jyldyǵyna arnalǵan tarıhı-tanymdyq kesh ótti

 QYZYLORDA. QazAqparat - Qyzylordada Tekeı Qarpyqulynyń 350 jyldyǵyna arnalǵan «Áz Táýkeniń bas sarbazy - Tekeı batyr» atty tarıhı-tanymdyq kesh uıymdastyryldy, dep habarlady QazAqparat tilshisi.

Myń  ólip, myń tirilgen halqymyzdyń tarıhı jady el Táýelsizdigi jolyndaǵy kúreste erekshe  erlikterimen  daralanǵan handar men batyrlardy  eshqashan sanamyzdan óshirgen  emes. Ultymyzdyń  memleket bolyp qalyptasýy  jolynda  el tizginin ustaǵan handar men  el qorǵaǵan  batyrlardyń  esimderi búgingi urpaq  aldynda ulyqtalyp, nasıhattalýda. 

Batyr babamyz Tekeı Qarpyquly  - qazaq ultynyń memlekettigin nyǵaıtýda  ólsheýsiz úles qosyp, el bıleý isindegi óziniń danalyǵynyń arqasynda  Táýke hannyń bas batyryna aınalǵan. Áz Táýke hannyń tusynda bes joryq jasalsa, 1711 jylǵy shaıqasta Tekeı batyr bas qolbasshy bolady. Tekeı batyrdyń Táýke hannyń tusynda qolbasshy bolǵanyn jáne qazaqtyń ulan-ǵaıyr jerindegi shaıqastardyń kópshiligine qatysyp, el men jer úshin  ter tókkenin, ulttyq batyrymyz dep dáriptep, esimin ulyqtaýǵa ábden laıyqty tulǵa ekendigi kesh barysynda sóz etildi.

Sharaǵa Qorqyt Ata atyndaǵy Qyzylorda memlekettik ýnıversıtetiniń tarıh ǵylymdarynyń kandıdaty, professor Merýert Ańsatova,«Qorqyttaný jáne ólke tarıhy» ǵylymı-zertteý ınstıtýtynyń ǵylymı qyzmetkeri Baqytjan Ahmetbek jáne  stýdentter qatysty.

Sondaı-aq munda «Táýelsizdik tumary - Tekeı batyr!» atty kitap kórmesi uıymdastyrylyp, bıblıografııalyq sholý jasaldy.