Qyzylordada tatar etnomádenı birlestiginiń 25 jyldyǵyn atap ótti
Merekelik sharaǵa oblystyq Qazaqstan halqy assambleıasynyń músheleri, Tatarstan Respýblıkasynan arnaıy shaqyrylǵan qonaqtar, birlestiktiń ardagerleri men jastary, buqaralyq aqparat quraldarynyń ókilderi qatysty.
Saltanat barysynda birlestiktiń belsendi músheleri oblys ákiminiń Qurmet gramotasy jáne Alǵys hatymen marapattaldy.
Dúnıejúzilik tatarlar kongresi atqarýshy komıteti tóraǵasynyń birinshi orynbasary Danıs Shakırov, Tatarstan Respýblıkasynyń Qazaqstandaǵy ókiletti ókiliniń kómekshisi Aıana Akımjanova jáne Qazaqstandaǵy tatar jáne bashqurt qaýymdastyǵynyń prezıdenti Gabdýlhaı Ishmýratov birlestikti 25 jyldyq mereıtoıymen quttyqtap, tatar etnomádenı birlestiginiń jetekshisi Galııa Gızatýllınany jáne onyń belsendilerin Dúnıejúzilik tatarlar kongresiniń medalimen marapattady.
Aıta ketý kerek, tatar etnomádenı birlestigi 1991 jyldyń 27 qańtarynda quryldy. Táýelsizdikpen birge shańyraq kótergen ortalyq atalǵan jyldar ishinde elimizdiń ósip-órkendeýine óz úlesin qosyp keledi. Birlestiktiń alǵashqy tóraıymy Ahmadeeva Naǵıma Abdýlqyzy bolatyn. Naǵıma Abdýlqyzy tatar etnomádenı birlestigin quryp, jumysyn júıelep, negizin qalady. Birlestikti 20 jyl kóleminde Galııa Gızatýllına basqaryp keledi.
Búgingi kúni Qazaqstanda 300 myńǵa jýyq tatar etnosy ómir súrip keledi. Al, Syr elinde 1500 tatar etnosy bar. Olardyń belsendileri únemi bas qosyp, mádenı salt-dástúrdi jańǵyrtýǵa atsalysyp, babadan qalǵan baı muralaryn saqtap qalýǵa baryn salyp keledi.
Birlestiktiń músheleri ártúrli salada ter tógip, el damýy jolynda eńbek etýde. Bastysy, olar birlik pen beıbit kúnderdiń qadirin tereń uǵynǵan. Sondyqtan da yntymaqtyń uıtqysy bolǵan oblystyq Qazaqstan halqy assambleıasyna olardyń alǵysy sheksiz.
Merekelik kesh aıasynda Tatarstan Respýblıkasynyń halyq ártisi Ferdınand Fathı, Halyqaralyq konkýrstar men festıvaldardyń laýreaty Sırına Zaınýtdınova jınalǵan jurtshylyqqa ásem ánderin tartý etti. Tatar halqynyń ulttyq bıi men ánderi oryndalyp, Syr ónerpazdary merekege oraı óz ónerlerin ortaǵa saldy.