Qyzylordada tarıhı jádigerler jınaqtalǵan kitap jaryqqa shyǵady
Bul jaıynda tarıh ǵylymdarynyń kandıdaty, Qorqyt ata atyndaǵy Qyzylorda memlekettik ýnıversıtetiniń arheologııa jáne etnografııa ǵylymı-zertteý ortalyǵynyń jetekshisi Ázilhan Tájekeev habarlady.
«Elbasymyz «Uly dalanyń jeti qyry» maqalasynda «Arhıv-2025» baǵdarlamasyn jasaý qajettigin atap ótti. Onda ejelgi dáýirden qazirgi zamanǵa deıingi kezeńdi qamtıtyn otandyq jáne sheteldik muraǵattar dúnıesine irgeli zertteýler júrgizýge jol ashylady. Osy maqsatta bizdiń ýnıversıtet oblystyq tarıhı ólketaný mýzeıimen birlesken jobany qolǵa aldy. Osynyń nátıjesinde «Horezm ekspedıtsııasynyń Syr óńirindegi zertteýleriniń tarıhy» jobasyn júzege asty», - dedi Ázilhan Tájekeev.
Syr óńirinde Horezm arheologııalyq-etnografııalyq ekspedıtsııasy 1946 jyldan beri zertteý jumystaryn jasady. Ekspedıtsııa músheleri Jetiasar, Shirik Rabat, Bábish molda, Soltústik Túgisken eskertkishterine alǵashqy arheologııalyq zertteýler jasady. Sol oryndardan tabylǵan qundy jádigerler búginde Reseıdiń Shyǵys halyqtary óneri mýzeıinde saqtaýly tur. Búginde bul qundylyqtar - Reseıdiń murasy.
«Reseılik arheologtar Jetasardyń ózinen 700-den astam obany qazǵan. Onda tabylǵan dúnıeler búginde Máskeý qalasyndaǵy mýzeıde saqtaýly. Biz sol muralardy sýretke túsirip qaıttyq. Ol qundylyqtar jóninde derekter jınaqtaldy», - dedi Ázilhan Tájekeev.
Endigi kezekte sol jádigerler jınaqtalǵan kitap-albom jaryqqa shyǵatyn boldy. Ol bıyl kópshilik qolyna tıedi dep josparlanyp otyr.
Esterińizge sala ketelik, Syǵanaq qalashyǵy ıÝNESKO dúnıejúzilik muralar tizimine engizilmek. Byltyr «Qorqyt ata» murasy ıÝNESKO-nyń materıaldyq emes muralary tizimine endi.