Qyzylordada tamponajdy tsement zaýyty salynýda

ASTANA. QazAqparat - Indýstrııalandyrý aıasyndaǵy jalpyulttyq telekópirde Memleket basshysy qýattylyǵy 1 mln tonna bolatyn tsement zaýytynyń qurylysymen tanysty. Tamponajdy tsement zaýyty 2019 jyly jumysyn bastaıdy, dep habarlaıdy QazAqparat.

«Gejýba Shıeli Tsement» JShS-niń basqarma tóraǵasy Lı Mıng jobanyń júzege asyrylýy týraly baıandady.

«Búgingi júzege asyp otyrǵan birlesken joba - Qazaqstan-Qytaı yntymaqtastyǵynyń birden-bir mysaly. Zaýyttyń negizgi ónimi - tamponajdy tsementtiń 30 paıyzy TMD, Qytaı jáne Ortalyq Azııaǵa eksporttalatyn bolady. Joba quny 64 mıllıard teńgeni quraıdy», - dedi Lı Mıng myrza.

Memleket basshysy kásiporynnyń jumysyna sáttilik tiledi.

Esterińizge sala keteıik, zaýyt qurylysy bıyl bastaldy. Nysan 2019 jyly paıdalanýǵa beriledi dep josparlanyp otyr. Kásiporynda 260 adamǵa turaqty jumys orny ashylady. Búginde kompanııa jergilikti 200 adamdy jumysqa qabyldaýdy bastady, 100 jumysshyny Qytaıǵa oqýǵa jiberip, qalǵan 100 qyzmetker jergilikti kolledjde oqytylatyn bolady.

Joba 51 birlesken qazaqstandyq-qytaılyq jobalar tizimine kirgen. Bas merdiger «Chaına Trıýmf Interneshnl» - halyqaralyq kóshbasshy kompanııalardyń biri, ınjenerlik jobalardy basqarý jáne ınjenerlik bas merdiger bolyp tabylatyn úzdik 50 ulttyq kásiporynnyń tizimine engenin atap ótý qajet. Tamponajdy tsement zaýytynyń ónimi qurylys, munaı-gaz jáne ýran óndirisinde keń qoldanylady. 

Jalpyulttyq telekópirde óńirlerden 10 myń jumys orny bar 25 ındýstrıaldyq joba tanystyryldy.