Qyzylordada suıyq zat tıelgen sheteldik júk kóligi janyp ketti
Oqıǵa búgin, 12 shildede saǵat 7:53-te «Samara-Shymkent» tas jolynyń Aral aýdany aýmaǵynda bolǵan. Jergilikti 112 qutqarý qyzmetine jol boıynda júk kóliginiń órtenip jatqany jóninde habarlama túsken.
«Atalǵan shaqyrtý boıynsha №3 órt sóndirý bólimi oqıǵa ornyna attandy. Barlaý jumystarynyń nátıjesinde tas joldyń 1311 shaqyrymynda Túrkııadan Qyrǵyzstan astanasy Bishkekke bara jatqan fýranyń tirkemesindegi suıyq zat tolyq janyp jatqany anyqtaldy. Kólik júrgizýshisi aman. Órt 9:25-te tolyq sóndirildi», - dep málim etti Qyzylorda oblysy Tótenshe jaǵdaılar departamenti Órt sóndirý jáne avarııalyq qutqarý jumystary qyzmetinen.
Oqıǵanyń mán-jaıy anyqtalyp, shyǵyn mólsheri eseptelip jatyr.
Eske salsaq, budan buryn Qyzylorda oblysynda qatty jel úılerdiń shatyryn ushyryp áketken.