Qyzylordada sýǵa ketken stýdenttiń denesi úsh kúnnen keıin tabyldy

QYZYLORDA. QazAqparat – Qyzylorda oblysynda Syrdarııa ózenine batyp ketken 20 jastaǵy jigittiń denesi úsh kúnnen keıin tabyldy, dep habarlaıdy QazAqparat tilshisi.

Oqıǵa 29 maýsym kúni saǵat 18:30 shamasynda Qarmaqshy aýdanynyń 102-shi razezd tusynda boldy. Tótenshe jaǵdaılar qyzmetine sol aýmaqtaǵy Syrdarııa ózenine 20 jastaǵy jigit sýǵa batyp ketkendigi jóninde habarlama túsken.

«Sýǵa batqan adam 2003 jyly týǵan, Qarmaqshy aýdany Aqaı aýylynyń turǵyny. Oblys ortalyǵyndaǵy «Bolashaq» ýnıversıtetiniń 2-kýrs stýdenti ekeni anyqtaldy», - dedi Qyzylorda oblystyq Tótenshe jaǵdaılar departamenti Órt sóndirý jáne avarııalyq-qutqarý jumystary qyzmetiniń baspasóz hatshysy Álııa Erejepova.

Vedomstvo málimetinshe, oqıǵa ornynda Aral aýdany Qamystybas eldi mekeninde ornalasqan qutqarý bólimshesiniń mamandary jumys atqardy. Nátıjesinde marqumnyń denesi úsh kúnnen keıin tabyldy.

Aıta ketsek, jyl basynan oblysta 16 adam sýǵa ketken.