Qyzylordada sý tapshylyǵynan kúrishtiń edáýir bóligine sý jetpeı qalý qaýpi bar

QYZYLORDA. QazAqparat - Qyzylorda oblysy Qazaly aýdanynda Syrdarııa ózenindegi sý tapshylyǵynan kúrishtiń edáýir bóligine sý jetpeı qalý qaýpi týyndap otyr, dep habarlaıdy QazAqparat tilshisi.

Bul málimet oblys ákiminiń birinshi orynbasary Serik Qojanııazovtyń Qazaly aýdanyna sapary barysynda belgili boldy.

Oblys ákiminiń birinshi orynbasary aýdandaǵy Basyqara aýylynda ornalasqan Á.Tynybaev atyndaǵy sý torabynda sharýashylyq basshylarymen júzdesti. Eginshiler sý jetispeýshiligi saldarynan egilgen kúrishtiń bir bóligi kúıip ketýdiń aldynda turǵanyn tilge tıek etti.

«Óz kezeginde oblys ákiminiń birinshi orynbasary Serik Salaýatuly aldaǵy ýaqytta sý jetispeýshilik máselesin boldyrmaý úshin arnaıy josparlar jasalyp jatqanyn jetkizdi. «Jalańtós batyr» JShS búgingi kúni sý tapshylyǵyn qatty sezinip otyrǵan sharýashylyqtyń biri. Qazirgi tańda sharýashylyqtyń 6 aýyspaly egistigindegi kúrish alqaptaryna sý jetispeýde. Bul máseleni sheshý úshin sharýashylyqqa sý keletin «Oń jaǵa» magıstraldy kanalynyń boıyna 3 nasos qoıyldy», - dep málim etti Qyzylorda oblysy ákimdiginen.

Aıta ketsek, bıyl Qyzylorda oblysynda sý tapshylyǵyna baılanysty kúrish ótken jylǵydan 5 myńǵa jýyq az egildi.