Qyzylordada stýdentterdi jataqhanamen qamtý máselesi talqylandy
Dostyq úıinde ótken jıynda «Joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartý» baǵytyndaǵy úshinshi bastamanyń aımaqta oryndalý barysy talqylandy. Oǵan tıisti jergilikti basqarýshy organ ókilderi, aımaqtaǵy joǵarǵy jáne orta arnaýly oqý oryndary jetekshileri, partııa belsendileri, Úkimettik emes uıymdar men qoǵamdyq birlestikterdiń basshylary, belsendi jastar men BAQ ókilderi qatysty. Atalmysh sharany «Nur Otan» partııasy oblystyq fılıaly uıymdastyrdy.
«Sońǵy eki jylda Syr óńirinde oblys ákimdiginiń qoldaýymen 6 kolledjdiń oqý ǵımaraty, oqý-óndiristik sheberhanalary men jataqhanalaryna kúrdeli, aǵymdaǵy jóndeý jumystary júrgizildi. Bıyl jergilikti bıýdjet qarjysy esebinen 429 mln teńgege Qarmaqshy aýdanyndaǵy agrarly-tehnıkalyq kolledjdiń jataqhanasyna kúrdeli jóndeý júrgizilmek. Jalpy jataqhanaǵa qajettilik 1375 oryndy ǵana qurap otyr», - dedi oblystyq bilim basqarmasynyń bastyǵy Maıra Meldebekova.
Qazirgi tańda oblysta 10772 stýdent bilim alyp otyrǵan 3 joǵary oqý orny, 20985 stýdenti bar 29 kolledj jumys isteıdi. Solardyń ishinde 11 kolledjdiń stýdentterine barlyǵy 1375 oryndy qamtıtyn jáne Qyzylorda medıtsınalyq joǵary kolledjine qosymsha 1 jataqhanaǵa qajettilik týyndap otyr.
«Byltyr 1-jartyjyldyqta 4 tehnıkalyq jáne kásiptik bilim berý, 11 jalpy orta bilim berý jáne 5 mektepke deıingi bilim berý uıymdaryna ishinara tekserý júrgizilgen. Tekserý qorytyndysymen barlyq 20 bilim berý uıymyna ákimshilik is qozǵalyp, ákimshilik aıyppuldar salyndy. Sonymen qatar, atalǵan bilim uıymdarynyń qorytyndy aktilerindegi málimetter ulttyq bilim berý derekter qoryna engizilgen málimettermen sáıkestendirildi», - dedi oblystyq bilim salasyndaǵy baqylaý departamentiniń basshysy Erlan Qarabalaev.
Aıta ketý kerek, Elbasynyń bes áleýmettik bastamasy aıasynda jyl saıyn bólinetin 54 myń grantqa qosymsha 2018-2019 oqý jylynda taǵy 20 myń grant bólindi. Onyń 11 myńy tehnıkalyq mamandyqtar boıynsha bakalavrlyq bilim berýge tıesili. Bul tórtinshi ónerkásiptik revolıýtsııa jaǵdaıyndaǵy jańa ekonomıkada zor suranysqa ıe bolatyn san myń jańa mamandy daıarlaýǵa múmkindik berýde. Atap aıtar bolsaq, ınjenerler, aqparattyq tehnologııa, robot tehnıkasy, nanotehnologııa salasyna qajetti mamandar daıarlanatyn bolady. Bul jastarǵa jasalyp otyrǵan memleket qamqorlyǵynyń aıqyn kórinisi.
Sonymen birge, tehnıkalyq jáne aýyl sharýashylyǵy mamandyqtary boıynsha barlyq joǵary oqý oryndary granttarynyń quny ulttyq joǵary oqý oryndarynyń granttary deńgeıine deıin kóterildi. Atalǵan sharalar orta mektep túlekterin joǵary bilimmen neǵurlym kóbirek qamtýǵa múmkindik beredi. Bul baǵytta aımaqtaǵy joǵarǵy jáne orta arnaýly oqý oryndary jetekshileri de atqarylǵan jumystardy jan-jaqty baıandap ótti.
Máselen, Qorqyt ata atyndaǵy Qyzylorda memelekettik ýnıversıteti rektorynyń mindetin atqarýshy Baqytjan Ábdýkarımovtyń aıtýynsha Qorqyt Ata atyndaǵy Qyzylorda memlekettik ýnıversıteti bıyl «Ónimdi ınnovatsııalardy yntalandyrý» jobasynyń jeńimpazy atanyp, 98,9 mıllıon teńgeniń grantyna ıe bolǵan. Ýnıversıtettiń bilim berý qyzmetin 7 fakýltet jáne olarǵa qarasty 30 kafedra júrgizedi. Qazirgi tańda ýnıversıtette joǵary bilim berý - bakalavrıatta 64 mamandyq, joǵary oqý ornynan keıingi bilim berý baǵytynda 30 mamandyq, doktorantýrada 9 mamandyq boıynsha mamandar daıarlanady.
«Jalpy 2018-2019 oqý jyly boıynsha ýnıversıtettiń kúndizgi bóliminde 3345 stýdent bilim alýda.Onyń 607 granttyq negizde. Oblys ákiminiń granty boıynsha 361 stýdent bilim alýda. Oblys ákiminiń granty óńirdegi bilim, ekonomıka, mádenıet, elektroenergetıka, aqparatttyq júıeler jáne t.b. salalaryn kadrlyq áleýetpen qamtamasyz etý maqsatynda qajetti, suranysqa ıe mamandyqtarǵa bólinip otyr», - deıdi Baqytjan Ábdýkarımov.
Jıyndy Keńes tóraǵasy, I.Ábdikárimov atyndaǵy Qyzylorda agrarlyq-tehnıkalyq joǵary kolledji dırektory Ibadýlla Quttyqojaev qorytyndylady. Ol keńes múshelerine 5 bastamanyń árbir baǵytynyń oryndalý barysyn udaıy baqylaýda ustap otyrý qajettigin nazarǵa saldy.