Qyzylordada sport kesheniniń shatyryn jaýyp jatqan bes adam jaraqat aldy

QYZYLORDA. QazAqparat - Qyzylorda oblysy Qazaly aýdanynda jańadan salynyp jatqan sport kesheninde shatyr jaýyp jatqan bes adam jaraqat alyp, aýrýhanaǵa tústi, dep habarlaıdy QazAqparat tilshisi.

Oqıǵa búgin, 25 qańtarda saǵat 11.00 shamasynda Qazaly aýdanynyń ortalyǵy - Áıteke bı kentindegi Janqoja batyr kóshesi boıynda jańadan salyp jatqan sport kesheni aýmaǵynda bolǵan.

Sport kesheninde tóbedegi bóreneler qulap, saldarynan aýdanda turatyn 30-40 jastaǵy 5 er azamat jaraqat alǵan.

Úsheýi «mıdyń shaıqalýy, ártúrli soǵylǵan jaraqattar» dıagnozymen aýrýhanaǵa jatqyzyldy. Ekeýine alǵashqy dárigerlik kómek kórsetilip, úıine qaıtaryldy.

«Atalǵan derek boıynsha QR Qylmystyq kodeksiniń 277-baby 1-bóligimen is qozǵalyp, tergeý áreketteri júrgizilip jatyr»,- dedi Qyzylorda oblystyq polıtsııa departamentinen.

Eske salsaq, budan buryn Qyzylordada aıdalada balshyqqa batyp qalǵan júrgizýshi qutqarylǵan edi.