Qyzylordada saılaý kúni tańerteń 10 sábı dúnıege keldi

QYZYLORDA. QazAqparat - Qyzylorda oblysynyń turǵyndary QR Prezıdenti saılaýynda belsendilik tanytýda, dep habarlaıdy QazAqparat tilshisi.

Qyzylorda oblysynda 366 aýmaqtyq saılaý ýchaskesi bar. Onda 197785 adam óz tańdaýyn jasaıdy.

Qyzylorda qalasynda oryn tepken Ana men bala ortalyǵynda qazirge deıin 300-ge tarta saılaýshy óz tańdaýyn jasap úlgerdi. Bir qyzyyǵy, búgin Ana men bala ortalyǵynda qazirge deıin 10 náreste dúnıege keldi. Olardyń 5-i ul, 5-i qyz bala. Egizder de bar. Sondaı-aq, saılaýda oblystyq balalar aýrýhanasyndaǵy em qabyldap jatqan sábılerdiń analary da belsendilik tanytýda. Solardyń biri Elmıra Qalybekova. Ol aýrýhanada ornalasqan №351 saılaý ýchaskesinde óz tańdaýyn jasady.

«Elimizdiń bolashaǵy úshin óz tańdaýymdy jasadym. Ózim senim bildirgen úmitkerge qoldaý bildirdim», - dedi ol.