Qyzylordada saýda ortalyǵy aldynda jergilikti turǵyndy pyshaqtap ketti

QYZYLORDA. QazAqparat - Qyzylordada jergilikti turǵynǵa pyshaq jaraqatyn salǵan kúdikti oqıǵa ornynan qashyp ketýge árekettendi. Polıtseıler kúdiktini izin sýytpaı qolǵa túsirdi, dep habarlaıdy QazAqparat tilshisi.

Qyzylorda qalalyq Polıtsııa basqarmasynyń 102 arnasyna 14 mamyr kúni oblys ortalyǵynda ornalasqan saýda ortalyǵynyń aldynda belgisiz adam jergilikti turǵynǵa pyshaq jaraqatyn salǵany jóninde habarlama kelip tústi. Onda kúdiktiniń oqıǵa ornynan boı tasalap ketkeni aıtylǵan.

«Jedel basqarý ortalyǵynyń beınebaqylaý kameralarynyń kómegimen qala kósheleriniń birinde kúdikti azamattyń basqarýyndaǵy avtokólik toqtatyldy. Kólikten aıǵaq zattar alyndy. Ol kóliginiń memlekettik nómirin aldyn ala sheship alǵan. Kúdikti ýaqytsha ustaý ızolıatoryna qamaýǵa alyndy. Atalǵan derek boıynsha QR Qylmystyq kodeksiniń 106-babynyń 1-bóligimen sotqa deıingi tergep-tekserý áreketteri júrgizilip jatyr. Polıtseıler oqıǵanyń mán-jaıyn anyqtalýda», - dep málim etti Qyzylorda qalalyq polıtsııa basqarmasynan.

Eske salsaq, budan buryn Qyzylordada bir top adam túrǵyn úı aýlasynda tóbelesip, bir-birine oq atqan.