Qyzylordada poshta arqyly túrmege esirtki joldap otyrǵan adam ustaldy

QYZYLORDA. QazAqparat - Qyzylordada 24 jastaǵy azamat poshta arqyly túzeý mekemesinde jazasyn ótep jatqandarǵa esirtki zatyn ótkizbek bolǵan, dep habarlaıdy QazAqparat tilshisi.

Mundaı jaǵdaı úsh márte qaıtalanǵan.

Polıtsııa qyzmetkerleri júrgizgen jedel izdestirý jumystarynyń nátıjesinde oblys ortalyǵynda turatyn 24 jastaǵy adam qolǵa tústi.

Ol ýaqytsha ustaý ızolıatoryna oqshaýlandyryldy.

Atalǵan derek boıynsha QR Qylmystyq kodeksiniń 297 babymen sotqa deıingi tergep-tekserý amaldary júrgizilýde.

Onda esirtki zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, olardy jóneltý ne ótkizý jaǵdaıy kórsetilgen.

Bıylǵy jyldyń alǵashqy aıynda oblystyq polıtsııa departamenti qyzmetkerleri esirtki quqyq buzýshylyqtyń 11 deregin anyqtady.

Onyń ishinde bireýi - esirtkini asa iri mólsherde satý maqsatynda saqtaý.

Zańsyz aınalymnan 15 keliden astam esirtki zaty tárkilengen.