Qyzylordada polıtseıler órtengen páter ishinde es-tússiz jatqan áıeldi qutqardy
Oqıǵa búgin, 21 mamyrda saǵat túngi 02.55-te oblys ortalyǵyndaǵy «Aqmeshit» shaǵynaýdany №2 úıdiń ekinshi qabatynda bolǵan. Dál sol ýaqytta Qyzylorda qalalyq polıtsııa basqarmasy patrýldik polıtsııa batalonynyń jaıaý baǵyttaǵy qyzmetkerleri polıtsııa kishi leıtenanty Talǵat Shalqarbaev, aǵa leıtenanttar Erjan Ánepıaev pen Bektur Satenov aldymen tótenshe jaǵdaılar departamentine habarlasyp, odan keıin turǵyndardy qutqarýǵa shuǵyl kirisken.
Talǵat Shalqarbaev qyzyl jalyn kórshi páterlerge taralyp ketpes úshin sóndirýge kiristi. Polıtseıler jedel sheshim qabyldap, páter esigin kúsh qoldanyp ashty. Ol jerde es-tússiz jatqan 54 jastaǵy azamatshany dereý alyp shyqty. Al qalǵan ekeýi kópqabatty úıdiń turǵyndaryn syrtqa shyǵardy. olardyń arasynda balalar da bar.
«Baǵyt aralaý kezinde jergilikti turǵyn kópqabatty úılerdiń birinen órt shyqqanyn aıtty. Biz oqıǵa ornyna dereý jettik. Ekinshi qabatta ornalasqan úıdiń esigin baltamen buzyp ashyp, es-tússiz jatqan áıeldi dalaǵa shyǵardyq. Órt sóndirýshiler men jedel járdem qyzmeti dereý shaqyrtyldy. Kópqabatty úı turǵyndary qaýipsizdigine baılanysty olardyń barlyǵyn syrtqa shyǵardyq», - dep, atap ótti polıtsııa aǵa leıtenanty Bektur Satenov.