Qyzylordada otbasy máselesine qatysty keńes ótti
Sharanyń negizgi maqsaty - óskeleń urpaqty jan-jaqty damytyp, tolyqqandy tulǵany qalyptastyrý. Jıynǵa oblys ákimi Nurlybek Nálibaev, memleket jáne qoǵam qaıratkeri Murat Baqtııaruly, qala, aýdan ákimderi, quqyq qorǵaý organdarynyń basshylary jáne selektorlyq rejımde aýdandyq qoǵamdyq keńes ókilderi, bilim salasynyń qyzmetkerleri men ata-analar qatysty.
Keńes moderatory, oblystyq «Amanat» partııasynyń tóraǵasy, tarıh ǵylymdarynyń kandıdaty, dotsent Naýryzbaı Baıqadamov jahandaný dáýirinde ár halyq, ár ult úshin dinin, tilin, mádenıetin, tarıhyn meılinshe saqtap qalýdyń zor mańyzyn atap ótip, osy rette otbasylyq tárbıe erekshe ról atqaratynyn aıtty.
Oblys ákimi Nurlybek Nálibaev kezdesýge aımaq basshysy ǵana emes, áke retinde ashyq pikirlesý úshin kelgenin aıtyp, óńirde balalar úshin atqarylǵan jumystardy baıandady.
«Memleket basshysy ótken jyldy «Balalar jylyna» arnap, aıryqsha mańyz berdi. Mereıli jyly jetkinshekterimizge burynǵydan da kóbirek kóńil bólýge, asqaq armandaryna basqan qadamdaryn demeýge kúsh saldyq. Búldirshinderge tartý retinde aımaqta demeýshilerdiń qoldaýymen quny 1,6 mlrd teńgege 80 balalar sport-oıyn alańyn paıdalanýǵa berdik. Tek qalanyń ortasynda ǵana emes, shetkeri aımaqtarda da oıyn alańdary salyndy. 2022 jyly 19 balabaqsha ashyldy. Ótken jyly 6 mektep tapsyryp, 2 apatty bilim berý uıymynyń máselesin sheshtik. Jalaǵash aýdanynda 250 oryndyq zamanaýı Oqýshylar úıin el ıgiligine tabystadyq. Úkimet basshysynyń Syr eline sapary barysynda 300 oryndyq jataqhanasy bar 400 oryndyq «fızıka-matematıka» baǵytyndaǵy mektep-ınternat, kópsalaly sport keshenin salý jobasy qoldaý tapty. Bıyl «QazGerMunaı» kompanııasy Qyzylordada zamanaýı Oqýshylar saraıynyń qurylysyn bastaıdy. Aldaǵy jańa oqý jylynyń qarsańynda 150 oryndyq eki mamandandyrylǵan mektep daryndy balalardy qabyldaıdy», - dedi oblys ákimi.
Aldaǵy 3 jylda 64 balabaqsha ashý josparlanýda. Osylaısha 11 myńǵa jýyq búldirshin mektepke deıingi tárbıemen qamtylady.
Buǵan qosa bıyl Jańaqorǵan, Shıeli, Qazaly, Aral aýdandarynda 940 oryndyq 4 jańa mektep paıdalanýǵa berilmek.
Memleket basshysynyń bastamasymen «Jaıly mektep» ulttyq jobasy aıasynda 15 100 orynǵa arnalǵan 21 mektep salynady. Jalpy quny 100 mlrd. asa teńgeni quraıtyn bul bilim salasyndaǵy buryn-sońdy bolmaǵan úlken joba.
Aımaqta jeke mektepterdiń de úlesi artýda. Qazirdiń ózinde óńirde 21 jeke mektep jumys istese, aldaǵy 3 jylda ınvestorlar 12 mektep salýǵa nıet bildirdi.
Óńirdegi jetistikterdi saralaǵan aımaq basshysy qoǵamda beleń alǵan ınternetke táýeldilik, qumar oıynǵa salyný, oqýshylar arasyndaǵy álimjettik jáne ózge de máselelerdiń aldyn alý maqsatynda tıisti basqarma basshylary men qala, aýdan ákimderine balalardyń bos ýaqytyn tıimdi ótkizý jáne olardy tolyqqandy áleýmettendirý is-sharalar keshenin qolǵa alýdy tapsyrdy.
Oblystyq bilim basqarmasynyń basshysy Meırambek Shermaǵanbet «Bilim berý uıymdarynda quqyq buzýshylyq pen zorlyq-zombylyqtyń aldyn alý jáne bala qaýipsizdigin qamtamasyz etý máseleleri» taqyrybynda baıandama jasady. Balalardyń bos ýaqytyn qamtý baǵytynda óńirde jalpy 61 mektepten tys qosymsha bilim berý uıymy, mektep janynda 2170 sporttyq sektsııa jáne 1942 úıirme jumys jasaıdy. Onda 156 764 bala qamtylǵan.
Oqýshylar qaýipsiz ortada ómir súrýi maqsatynda aımaqtaǵy barlyq bilim berý uıymdary beınebaqylaý júıesimen 100% qamtylyp, 170 mektepke polıtsııa bólimshelerine qosylatyn dabyl túımesin ornatý úshin 97 mln.teńge bólindi. Barlyq bilim berý uıymdarynda dabyl túımesiniń iske qosylýy osy jyly tolyqtaı sheshimin tapty.
Keńes otyrysyna arnaıy qatysqan memleket jáne qoǵam qaıratkeri Murat Baqtııaruly óz baıandamasynda qoǵamdaǵy ózekti máselelerdi zerdelep, kıberbýllıng, mobbıng sekildi asa qaýipti qubylystardyń áserin nazarǵa saldy.
Baıandamashylar óz salalary boıynsha tájirıbelerimen bólisip, bala tárbıeleýge qatysty usynystaryn ortaǵa saldy.