Qyzylordada órtengen páterde es-tússiz jatqan er adam qutqaryldy
QYZYLORDA. QazAqparat - Qyzylordalyq órt sóndirýshiler qyzyl jalynǵa oranǵan páterdiń ishinde es-tússiz jatqan 31 jastaǵy er azamatty qutqardy, dep habarlaıdy QazAqparat tilshisi.
Oqıǵa búgin, 1 qarashada saǵat 05.35-te Qyzylorda qalasyndaǵy Amankeldi kóshesi №110 úıdiń tórtinshi qabatyndaǵy páterde bolǵan. №2 mamandandyrylǵan órt sóndirý bóliminen 5 qyzmetker 1 tehnıka jáne avtosatymen oqıǵa ornyna bardy.
«Oqıǵa ornyna barǵan órt sóndirýshiler úsh bólmeli páterdiń turmystyq zattary janyp jatqany jáne jatyn bólmede 1991 jylǵy er adamnyń es-tússiz jatqanyn baıqady. Órtti der kezinde oqshaýlaý maqsatynda qosymsha kómek retinde qajetti tehnıka shaqyrtyldy. Órt sóndirý kezekshi qyzmeti jedel kezekshiniń orynbasary Oljas Ahmetov bastaǵan qutqarýshylar jedel járdem jetkenshe kómirqyshqyl gazyna ýlanyp, es-tússiz jatqan 1991 jylǵy týǵan azamatty qutqaryp, alǵashqy medıtsınalyq kómek kórsetildi. Órten zardap shekken azamattyń jaǵdaıy aýyr, qazir ol dárigerlerdiń jiti qadaǵalaýynda. Órt sóndirý qyzmetinen jalpy 4 arnaıy, 1 shtabtyq tehnıka jáne 15 qyzmetker jumyldyryldy», - dedi Qyzylorda oblystyq Tótenshe jaǵdaılar departamenti Órt sóndirý jáne avarııalyq-qutqarý jumystary qyzmetiniń baspasóz hatshysy Álııa Erejepova.
Órttiń shyǵý sebebi men shyǵyny anyqtalýda. Mamandardyń jedel jáne birikken is-qımyldarynyń nátıjesinde ózge páterlerge taraýyna jol berilgen joq.
Órt 05.58-te oqshaýlandyrylyp, 06.08-de tolyǵymen sóndirildi.
Eske salsaq, budan buryn Qyzylorda oblysynda 800 teń shóp janyp ketti.