Qyzylordada ónegeli otbasylardyń baıqaýy ótti

QYZYLORDA. QazAqparat - Qyzylordada «Ónegeli otbasy - rýhanı jańǵyrýdyń ózegi» taqyrybynda bastaýysh partııa uıymy músheleri arasynda otbasylyq baıqaý ótti, dep habarlady QazAqparat tilshisi.

Atalǵan shara «Nur Otan» partııasynyń «Baqytty otbasy - Baqytty balalyq shaq» partııalyq jobasy aıasynda ótkizildi.

Shara shymyldyǵyn ashqan oblystyq partııa fılıaly tóraǵasynyń birinshi orynbasary Ibadýlla Quttyqojaev otbasy - bizdiń qoǵamymyzdyń qundylyqtaryn saqtaýdyń asa mańyzdy ınstıtýty ekenin atap ótti.

«Elbasy, partııa Tóraǵasy Nursultan Nazarbaev «Bolashaqqa baǵdar: rýhanı jańǵyrý» atty baǵdarlamalyq maqalasynda ulttyq salt-dástúrimiz, tilimiz ben ádebıetimiz, ulttyq rýhymyz boıymyzda máńgi qalýǵa tıistigin atap kórsetken. Bul - jahandaný dáýirinde óz tarıhynyń, mádenıeti men tiliniń qadirine jetetin halyq ǵana tabysty órkendeı alatyndyǵynyń kepili. Sondyqtan otbasyndaǵy yntymaqty, bereke men birlikti saqtaı otyryp, otbasy qundylyqtaryn nasıhattaý, damytý bizdiń strategııalyq basymdyǵymyz bolyp tabylady, - dedi Ibadýlla Quttyqojaev.

Bul baıqaýda aýmaqtyq kezeńnen ozyq shyqqan 12 otbasy qatysyp, synǵa tústi.

Shara sońynda júldeli oryndar anyqtaldy. Bas júldeni Syrdarııa aýdandyq partııa fılıalyna qarasty «Mádenıet úıi» bastaýysh partııa uıymynan Kóshekbaevtar otbasy, І oryndy Qazaly aýdandyq fılıalynyń «Aqjelken» bastaýysh partııa uıymy, Táńirbergenovter otbasy, ІІ oryndy qalalyq fılıalyna qarasty «Symbat» bastaýysh partııa uıymy, Nurymbetovter otbasy jáne «Turan» fılıalyna qarasty «Kórmek» bastaýysh partııa uıymy, Mırmanovtar otbasy ıelense, ІІІ oryn Jalaǵash jáne Jańaqorǵan aýdandyq fılıaldaryna qarasty «Jańatalap», «Óner» bastaýysh partııa uıymdary otbasylaryna buıyrdy.

Qalǵan bastaýysh uıym otbasylary túrli nomınatsııalarǵa ıe bolyp, arnaıy alǵys hattar jáne estelik syılyqtarmen marapattaldy.