Qyzylordada oqýshylar egin ónimdiligin baqylaý tehnologııasyn oılap tapty
Qyzylorda qalasyndaǵy Nazarbaev zııatkerlik mektebiniń 11-synyp oqýshylary Eńlik Muratbek pen Nazgúl Ydyrys egin alqaptarynyń ónimdiligin baqylaý jáne ónim kólemin boljaý tehnologııasyn oılap tapty.
Bul avtomatty júıe eginshilerdiń jumysyn ońtaılandyryp, ónimdiligin arttyrýǵa múmkindik beredi.
«Avtomatty qondyrǵymyz topyraq pen aýa temperatýrasyn anyqtap, sýdyń mólsheri boıynsha aqparat jınaýǵa múmkindik beredi. Bul málimetterdi radıo arqyly qabyldaǵyshqa jetkizip, aýyl sharýashylyq salasyn jandandyrýǵa septigin tıgizedi», - deıdi joba jetekshisi, ınformatıka pániniń muǵalimi Ádiljan Naýan.
Sondaı-aq, atalǵan mekteptiń 10-synyp oqýshylary Sanııa Muratova men Jansaıa Ótepbergenova egin alqaptaryn sýarýda avtomattandyrylǵan júıeni qosýdy usynady.
Olar jasaǵan agroplatforma egis alqaptaryn ońtaıly sýarý máselesin sheshedi jáne eń bastysy sý resýrstaryn únemdeıdi.
Eske salsaq, budan buryn semeılik oqýshy aýyz sý máselesin sheshýdiń tıimdi tásilin oılap tapty.