Qyzylordada oqýshylar beınerolık baıqaýynda synǵa tústi

QYZYLORDA. QazAqparat - Qyzylorda oblysy mektepterinde bilim alatyn oqýshylarǵa arnalǵan «Men álemdi ózgertemin» atty beınerolık baıqaýy máresine jetti. Oǵan Qyzylorda qalasy men barlyq aýdannan 26 talapker qatysty, habarlaıdy QazAqparat tilshisi.

Atalmysh shara Tuńǵysh Prezıdent - Elbasy Nursultan Nazarbaevtyń «Bolashaqqa baǵdar: Rýhanı jańǵyrý» baǵdarlamasy aıasynda qolǵa alyndy. Ony oblystyq «Rýhanı jańǵyrý» ortalyǵy uıymdastyrdy.

«Jas urpaqqa bilim berýmen qatar olardyń básekelik qabiletin, sanasyna ozyq tájirıbelerdi sińire bilýge úıretýden esh utylmasymyz anyq. Balalardy oqýǵa, bilimge úırete bergen durys. Olarǵa oı salyp, baǵyt siltep otyrsaq, jaqsy nátıjege jetedi. Balaǵa jaqsy ataýlyny kórsetýden jalyqpaýymyz kerek», - dedi «Rýhanı jańǵyrý» ortalyǵynyń «Tárbıe jáne bilim» bólimniń basshysy Álıma Ábdihalyqova.

Baıqaý barysynda Qyzylorda qalasyndaǵy A.Baıtursynov atyndaǵy №211 mektep oqýshysy Nurdáýlet Bısembaev birinshi oryn aldy. Odan keıingi oryndardy Qazaly aýdany №170 mekteptiń 8-synyp oqýshysy Nazerke Temirhan, Qarmaqshy aýdany №273 mekteptiń 10-synyp oqýshysy Baǵdat Jumadilov pen Aral aýdany №13 mekteptiń 9-synyp oqýshysy Danııar Tóleýov ózara bólisti.

«Qazirgi qoǵamda balalarǵa zorlyq-zombylyq jasaý kóbeıip ketti. Eger balalardy eshkim urmasa, onda búkil álem meıirimge tolar edi. Biz vıdeorolıkte osy oıymyzdy jetkizgimiz keldi. Men balalardy zulymdyqtan qorǵaǵym keldi», - dedi Nurdáýlet Bısembaev.

Sondaı-aq, baıqaýǵa qatysqan oqýshylar ózge de taqyryptarda oılaryn beınerolık arqyly jetkizdi.