Qyzylordada «Myń bala» respýblıkalyq jobasynyń baıqaýy ótti
Bul týraly QazAqparat tilshisi habarlady.
Qazaqstan halqy Assambleıasynyń bastamasymen 2015 jyldan bastap qolǵa alynǵan jobaǵa aǵymdaǵy jyly barlyǵy 2000 oqýshy belsendi túrde atsalysty.
Baıqaý úsh baǵyt boıynsha júrgizildi. Birinshisi, «Asyl sóz» mektebi» oblystyq «Sheshendik óner» baıqaýyna - 32, ekinshisi, «Kemel eldiń kemeńger qalamgerleri» respýblıkalyq shyǵarmalar baıqaýynyń óńirlik kezeńine - 28, úshinshisi, «#Myńbala2017» vıderolıgine 45 bala qatysty.
Baıqaýdyń maqsaty - etnos toptarynyń jastary arasynda memlekettik tildiń qoldanylý aıasyn keńeıtý, til mádenıetin kóterý, sheshendik ónerdiń muralaryn nasıhattaý, tilge sheshen sóz sheberleriniń ónerine qoldaý kórsetý. Sondaı-aq, óskeleń urpaqtyń boıynda patrıottyq sezimdi tárbıeleıtin, bilim men ózin-ózi jetildirýge degen qushtarlyqty arttyratyn, elge qamqor bolýǵa baýlıtyn esse men óleńder jazý jáne oqýshylardyń shyǵarmashylyq, zııatkerlik qabiletin damytýǵa qoldaý kórsetý bolyp tabylady.
Baıqaýǵa aýdandardan, Qyzylorda jáne Baıqońyr qalasynan 8-11 synyp aralyǵyndaǵy túrli etnos ókilderiniń oqýshylary qatysty. Qazylar alqasynyń quramynda fılologııa ǵylymdarynyń kandıdaty, professor Aman Abasılov, oblystyq ishki saıasat basqarmasy «Tilderdi oqytýdyń óńirlik ortalyǵy» MKQK mamany Lázzat Ortaeva, «Qoǵamdyq kelisim» KMM bólim basshysy, QR qoǵam qaıratkeri Erjan Ýáıis boldy. Qatysýshylardyń shyǵarmalary qazaq tilinde usynylyp, ádilqazylar jeńimpazdardy anyqtady.
Nátıjesinde, ár nomınatsııa boıynsha jeńimpaz atanǵan oqýshylar arnaıy dıplomdarmen jáne baǵaly syılyqtarmen marapattaldy. «Asyl sóz» mektebi» oblystyq «Sheshendik óner» baıqaýy boıynsha birinshi oryndy Syrdarııa aýdany №36 orta mektebi, ekinshi oryndy Shıeli aýdany №252 orta mektebi, úshinshi oryndy Jalaǵash aýdany №31 orta mektebi men Qyzylorda qalasy №3 mektep gımnazııasy ıelendi.
«Kemel eldiń kemeńger qalamgerleri» respýblıkalyq shyǵarmalar baıqaýynyń óńirlik kezeńinde birinshi oryndy Syrdarııa aýdanynan Núrgúl Ýákilova, ekinshi oryndy Jalaǵash aýdanynan Tımýr Lı qanjyǵasyna baılady.
«#Myńbala2017» vıderolıgi boıynsha birinshi orynǵa Aral aýdanynan Rınat Chýmash, ekinshi orynǵa Qarmaqshy aýdanynan Gúlhanym Mardıeva, úshinshi orynǵa Jalaǵash aýdany laıyq dep tanyldy.
Jeńimpazdar respýblıkalyq baıqaýǵa joldama aldy.