Qyzylordada munaı urlaǵandardyń isine núkte qoıyldy
Sot zalynda ıne shanshar jer bolmady. Sottalýshylardyń týystary men quqyq qorǵaýshylar lyq toly boldy. Tipti, arnaıy jasaq sarbazdary qaýipsizdikti qamtamasyz etýge májbúr boldy. Jalpy, shýly istiń sot protsesi naýryz aıynda bastalǵan bolatyn. Kúdiktilerdiń quqyǵyn 30 advokat pen 15 qoǵamdyq qorǵaýshy qorǵady. 100-ge jýyq kýágerden jaýap alynyp, 143 tomdyq is egjeı -tegjeıli zerdelendi.
Sottalýshylardyń arasynda kásipkerler, munaı kompanııasynyń jumysshylarymen qatar, quqyq qorǵaý organdarynyń sheńdi qyzmetkerleri boldy. Tergeý kezinde Qyzylorda oblystyq ishki ister departamenti uıymdasqan qylmystyq toppen kúres basqarmasynyń burynǵy bastyǵy Berik Ótenovtiń de jasaǵan qylmystyq áreketi áshkere boldy. Qylmyskerlermen kúresýdiń ornyna polkovnıktiń olarǵa «qamqor» bolǵandyǵy dáleldendi.
Jalpy, munaı urlaýmen eki qylmystyq toptyń aınalysqandyǵy belgili boldy. Birinshi top qara altyndy urlasa, ekinshileri ony saqtap, shetelge shyǵarýmen aınalysqan. Qaladaǵy «KAIS-Servıs» jaýapkershiligi shekteýli seriktestiginiń qoımasy osy maqsatta paıdalanylǵan bolyp shyqty. Shıkizat negizinen kórshi Qyrǵyzstan eline jiberilip otyrǵandyǵy anyqtaldy. Uıymdasqan qylmystyq topqa Kenjebek Basyqaraev esimdi kásipker jetekshilik etken.
Іsti qaraǵan sýdıa Ashat Sabyrovtyń úkimdi bir jarym saǵat oqýyna týra keldi.
«Toptyń lıderi - Kenjebek Basyqaraev 10 jylǵa, Berik Ótenov 9 jylǵa sottaldy. Sondaı-aq, toptyń ózge músheleri úsh jyldan jeti jylǵa deıin bas bostandyqtarynan aıyryldy. Taǵy 4 adam shartty túrde jazalandy», - dep málimdedi Qyzylorda oblystyq mamandandyrylǵan aýdanaralyq sotynyń keńse meńgerýshisi Qarakóz Sársenbaeva.