Qyzylordada munaı ónimderin zańsyz óńdep satqan kásipker sottaldy

QYZYLORDA. QazAqparat - Qyzylorda oblysynda munaı ónimderin zańsyz óńdegene, jáne ony satqan 48 jastaǵy jazalandy, dep habarlaıdy QazAqparat tilshisi.

Atalmysh qylmystyq is Qyzylorda oblysy boıynsha ekonomıkalyq tergeý departamentiniń óndirisinde qaraldy. 48 jastaǵy er adam 2016 jyldan bastap kásipkerlikpen aınalysqan. Sol arqyly oblystaǵy munaı kompanııalarymen munaı basseınderin tazalaý, nefteshlamdardy shyǵarý jáne joıý qyzmetine baılanysty kelisimshart jasaǵan. Degenmen ýaqyt óte kele zańsyz áreketterge bet burǵan.

«Kelisimderdi paıdalanyp, óńdelmegen munaı ónimderin qyzdyryp, tundyrylǵan ónimdi ıemdený jáne satý josparyn iske asyrǵan. Paıda bolǵan ónimdi munaı qaldyqtaryn tasymaldaýǵa arnalǵan kólik arqyly ken ornynan alyp shyǵyp otyrǵan. Onyń árbir tonnasy birneshe zańdy tulǵaǵa 110 myń teńgeden satylǵan», - dep málim etti Qyzylorda oblysy boıynsha ekonomıkalyq tergeý departamenti.

Bul boıynsha QR Qylmystyq kodeksiniń 197-baby 3-bóligi, 18-babynyń 1-bóligimen qylmystyq is qozǵaldy. Onda munaı jáne munaı ónimderiniń shyǵarý zańdylyǵyn rastaıtyn qujatsyz tasymaldaǵany, ıemdengeni, ótkizgeni, saqtaǵany, munaıdy qaıta óńdeý, qylmystyq jolmen túsken tabysty zańdy aınalymǵa tartyp, ıemdenip jáne paıdalaný jaǵdaılary kórsetilgen.

Qyzylorda qalalyq №2 sotynyń úkimimen oǵan 1 jyl 6 aıǵa bas bostandyǵynan shekteý jazasy taǵaıyndaldy. Jaza merzimine probatsııalyq baqylaý belgilendi.