Qyzylordada mobıldi beketten ótpek bolǵan kólikten asa iri kólemde esirtki tabyldy

QYZYLORDA. QazAqparat - Qyzylorda oblysynda mobıldi beketten ótpek bolǵan kólikten asa iri kólemde esirtki tabyldy, dep habarlaıdy QazAqparat tilshisi.

Oblysta «Qarasora-2022» jedel-profılaktıkalyq is-sharasy ótti. Atalǵan shara barysynda qyzylordalyq polıtseıler mobıldi bekette Túrkistan qalasynan Nur-Sultan qalasyna qaraı baǵyt alǵan «Honda Odyssey» avtokóligin toqtatqan edi.

«Tekserý barysynda avtokóliktiń júk salǵyshynan 1,5 kelige jýyq marıhýana tabyldy. Kúdikti ýaqytsha ustaý ızolıatoryna qamaýǵa alyndy. Atalǵan is boıynsha QR Qylmystyq kodeksiniń 296-babynyń 4-bóligimen sotqa deıingi tergep-tekserý júrgizilýde», - dep málim etti Qyzylorda oblystyq polıtsııa departamentinen.

Vedomstvo málimetinshe, bıylǵy jyldyń alty aıynda oblys kóleminde esirtkiniń zańsyz aınalymyna baılanysty quqyq buzýshylyqtardyń 96 deregi anyqtaldy. Onyń ishinde 19-y esirtki satý, 6-y esirtki zatyn asa iri mólsherde saqtaý, 2-i esirtki jarnamalaý, 19-y esirtki ósirý sanalady. Zańsyz aınalymnan 23 kelige jýyq esirtki zaty tárkilendi.

Eske salsaq, budan buryn Qyzylordada sheńgel men sekseýildiń arasyna esirtki ósirgen aýyl turǵyny ustaldy.