Qyzylordada memlekettik baǵdarlamalar kásipkerlikti damytýǵa oń áserin tıgizdi

QYZYLORDA. QazAqparat - Qyzylorda oblysynda memlekettik baǵdarlama sheńberinde kásipkerlik salany qoldaý baǵytynda naqty ister atqarylyp keledi, dep habarlaıdy QazAqparat tilshisi.

Byltyr «Bıznestiń jol kartasy 2025» memlekettik baǵdarlamasyn iske asyrý úshin 4 173,13 mln teńge qaraldy. Atalǵan qarjy sýbsıdııalaý jáne ishinara kepildik berýge jumsaldy. Sondaı-aq, ol granttyq qarjylandyrýǵa qarastyryldy.

Nátıjesinde baǵdarlama aıasynda nesıe portfeli 30,9 mlrd. teńge bolatyn 2048 joba sýbsıdııalanyp, birshama jobaǵa memleket kepildigi usynyldy. Olardyń basym bóligi kóterme jáne bólshek saýda, qyzmet kórsetý, óńdeý ónerkásibi, kólik jáne qoımalaý, aýyl sharýashylyǵy jáne densaýlyq saqtaý, bilim, baılanys, oıyn-saýyq jáne tamaqtaný qyzmeti sekildi ózge salalarǵa bólingen.

«Byltyr sýbsıdııalanǵan jobalar sany 2010-2020 jyldar aralyǵyndaǵy jobalardyń jalpy sanynan 27,5 paıyzǵa artyq boldy. Jalpy, nesıelendirilgen jobalardyń ósýi, eń aldymen pandemııa ahýalynda Úkimetpen qabyldanǵan jedel sharalaryna baılanysty júrgizildi. Osy maqsatta, baǵdarlamaǵa «portfeldik nesıeleý» jańa quraly engizildi. Onyń negizinde nesıeler boıynsha sýbsıdııalaý jáne ishinara kepildendirý quraldarynyń tetikteri birshama jeńildetilip, salalyq shekteýler alynyp tastaldy.

Portfelshdik nesıeleý quraly aıasynda ekinshi deńgeıli banktermen nesıe boıynsha ótinimder qarastyrý tártibi ońtaılandyryldy», - dedi oblystyq kásipkerlik jáne týrızm basqarmasynyń basshysy Ferdoýsı Qojabergenov.

Eske salsaq, bıyl Qyzylorda oblysynda memqyzmetshiler sany 330 adamǵa qysqardy.