Qyzylordada memqyzmetke qabyldanǵandar ant berdi

QYZYLORDA. QazAqparat - Búgin Qyzylorda qalasynda Qazaqstan Respýblıkasynyń Memlekettik qyzmetshi kúnine arnalǵan saltanatty shara bolyp ótti. 

Oblys ákimi Qyrymbek Kósherbaev áriptesterin kásibı merekelerimen  quttyqtady, dep habarlady QazAqparat.

- Memleket basshysy da óziniń halyqqa jáne qoǵamǵa tynbaı qyzmet etýimen, Qazaqstan men qazaqstandyqtardyń ıgiligi úshin jasap jatqan ólsheýsiz eńbegimen bizge jaýapkershiliktiń joǵary úlgisin kórsetip otyr. Memlekettik qyzmetshiniń basty mindeti - týǵan Otany men halqyna adal qyzmet etýimen baǵalanady. Memlekettik qyzmetshi el seniminen shyǵa bilse, odan joǵary mártebe, odan artyq baqyt joq dep esepteımin, - dedi oblys ákimi Q.Kósherbaev.

 

Saltanatty shara barysynda memlekettik qyzmetke jaqynda qabyldanǵan  oblys ákimdiginiń qyzmetkerleri saltanatty túrde ant qabyldady. Sonymen qatar, memlekettik organdardyń  mamandary  men sala  ardagerleri marapattaldy.

Sondaı-aq, memlekettik qyzmettiń ımıdjin kóterý maqsatynda ótken jýrnalıster  arasyndaǵy shyǵarmashylyq baıqaýdyń jáne memlekettik qyzmetshilerdiń oblystyq spartakıadasynyń  jeńimpazdary marapattaldy.