Qyzylordada mektepke jarylǵysh zat qoıylǵany jóninde jalǵan habarlama berildi
15:08, 24 Sáýir 2023
QYZYLORDA. QazAqparat - Qyzylorda qalasynda mektepke jarylǵysh zat qoıylǵany jóninde habarlama jalǵan bolyp shyqty, dep habarlaıdy QazAqparat tilshisi.
Oqıǵa oblys ortalyǵyndaǵy mektepterdiń birinde bolǵan.
«Búgin, 24 sáýirde polıtsııaǵa Qyzylorda qalasyndaǵy mektepterdiń birinde ǵımaratqa jarylǵysh qurylǵy salynǵany týraly habarlama kelip tústi. Oqıǵa ornyna shuǵyl túrde jedel qyzmetter bardy. Ǵımarattan adamdar evakýatsııalanyp, tekserildi. Tyıym salynǵan zattar men jarylǵysh qurylǵylar tabylmady», - dep málim etti oblystyq polıtsııa departamentinen.
Qyzylorda oblysynyń Polıtsııa departamenti qylmystyq quqyq buzýshylyq sanalatyn terrorızm aktisi týraly jalǵan habar berýdiń jaýapkershiligi týraly eskertedi. Atap aıtqanda, QR Qylmystyq kodeksiniń 273-babynda 5 jylǵa deıin bas bostandyǵynan aıyrý jazasy qarastyrylǵan.