Qyzylordada mektep ashanalaryndaǵy mázir talapqa saı emes
Bul derekter «Nur Otan» partııasy oblystyq fılıaly partııalyq baqylaý komıssııasynyń arnaıy monıtorıngi barysynda belgili boldy. Esterińizge sala ketelik, atalmysh partııa respýblıka boıynsha «Mektep ashanalary» jobasyn qolǵa alǵan edi.
Komıssııa músheleri shara barysynda oblys ortalyǵyndaǵy №9, 12, 136, 211 mektepterde boldy. Onda tamaq máziriniń talapqa saı bekitilmegeni anyqtaldy. Tamaqtyń qunarsyzdyǵy men tamaq saqtaý tártibi saqtala bermeıtini kózge tústi. Tipti ydys-aıaqtyń tazalyǵy da syn kótermeıdi.
Komıssııa quramynda densaýlyq saqtaý, úkimettik emes uıymdar jáne ata-analar komıtetiniń ókilderi bar. Olar joba aıasynda birneshe márte reıd júrgizdi.
Monıtorıng tobynyń jetekshisi Jandos Tusmaǵanbetovtiń aıtýynsha, tamaq máziriniń qunarsyzdyǵy baıqalǵan. Ol oqýshylarǵa nebári 220 teńgelik tamaqtyń berilýi aqylǵa qonymsyz ekenin aıtady. Standart boıynsha balalardyń jasyna qaraı onyń mólsheri táýligine 550-700 teńgeden tómen bolmaýy tıis. Degenmen ol talap saqtala bermeıdi. Jemis-jıdek qarastyrylmaǵan. Alma aptanyń tek sársenbi kúni beriledi. Keı bilim oshaqtarynda kúndelikti as máziriniń kestesi jasalmaǵan. As saqtaý qoımasynyń jaǵdaıy da alańdatady.
«Partııalyq joba aıasynda bolashaq urpaqtyń saýlyǵyn nyǵaıtý kózdelip otyr. Barlyq mektepke Qazaq taǵamtaný akademııasynyń usynysyna sáıkes jańa as máziri joldandy. Ol sanıtarlyq qadaǵalaý oryndarymen kelisilgen. Bul is partııa bastamasymen qolǵa alynǵan edi. Sol baǵytta naqty sharalar uıymdastyrý jumysyna nazar aýdaramyz», - dedi partııalyq baqylaý komıssııasynyń jetekshisi Aıda Ábıbýllaeva.