Qyzylordada metsenattar týǵan jerdi túletýge 13,2 mlrd teńge bóldi
Tuńǵysh Prezıdent - Elbasynyń tikeleı tapsyrmasymen qolǵa alynǵan «Bolashaqqa baǵdar: rýhanı jańǵyrý» baǵdarlamasynyń «Týǵan jer» arnaıy jobasy aıasynda sońǵy eki jyldan astam ýaqyttan beri kóptegen jumystar atqaryldy. Igilikti isti júzege asyrý arqyly týǵan jerdi kórkeıtý men damytý baǵytynda kóptegen jumystar júzege asty. Oǵan kásipkerler, demeýshi azamattar jáne jastar tartyldy. Nátıjesinde Syr óńirinde bul baǵytta 157-den astam is-shara ótti. Onyń ishinde 58-i qaıyrymdylyq baǵytynda jalǵasty.
Kásipkerler, demeýshi azamattar jáne metsenattar bilim, mádenıet, bilim uıymdarynyń ǵımarattaryn qaıta jańǵyrtýǵa belsene qatysty. Balalarǵa oıyn alańdary salyndy. Alleıalar men skverler boı kóterdi. Oǵan 13,2 mlrd teńge kóleminde qarjy tartylǵan.
«Atap aıtqanda, Qyzylorda qalasyndaǵy №140 mektepte sport alańy salyndy. Al «Mereı» shaǵynaýdanynda jeke kásipkerler balalardyń oıyn alańdaryn el ıgiligine berdi. Syrdarııa aýdandyq emhanasynyń jylý jáne káriz júıeleri de kásipkerler esebinen jańalandy. Atalmysh aýdannyń «Shaǵan» aýylynda «Shaǵan Jer» JShS tarıhı mýzeı salyp berse, A.Toqmaǵanbetov aýylynda kópir kópshiliktiń kózaıymyna aınaldy. Jalaǵash aýdany Tań aýylynda ortalyq alań qaıta jasandy. Al Shıeli aýdany Tartoǵaı aýylynda medıtsınalyq beket el ıgiligine berilse, atalmysh aýdannyń Jýantóbe jáne Bestam aýyldarynda kásipkerler demeýshiligimen sporttyq-saýyqtyrý keshenderi iske qosyldy», - deıdi Qyzylorda oblystyq «Rýhanı jańǵyrý» ortalyǵynyń bólim basshysy Gúlmıra Áshirbekova.
Mundaı ıgilikti sharalar Shıeli aýdanynda da joǵary deńgeıde júzege asyp keledi. Atap aıtqanda, jergilikti kásipker Erbolat Mashrapın Alǵabas aýylynda quny 100 mln teńge turatyn sport keshenin salyp berdi. Bestam aýyldyq okrýginde de sport kesheni boı kóterdi. Ony «Qozybaev» sharýa qojalyǵynyń tóraǵasy Baımuhanbet Qozybaev óz qarjysyna saldy. Bul maqsatta kásipker 66 mln teńge jumsaǵan. Aýdandaǵy «Tóńkeris-K» JShS dırektory Baýyrjan Kópeev jeke qarajatyna eldi mekende sport keshenin ashty. Atalmysh keshenniń jobalyq quny - 97 mln 300 myń teńge. Sondaı-aq, metsenattardyń kómegimen aýdan ortalyǵynda 30 mln teńgege alleıa salyndy.
Qyzylorda oblysy Jalaǵash aýdany «Qurmanbaı ata» sharýa qojalyǵynyń ıesi Erkin Bekjanov alma baǵyn ósirýdi qolǵa aldy. Ol 5 gektar jerge 13 myń túp alma aǵashyn ekti. Metsenat óz qaltasynan 20 mıllıon teńge qarjy shyǵaryp, aýylynyń irgesinen jer alyp, 13 túp myń alma aǵashyn egýge kiristi.
«Qazir munda jumys qyzyp jatyr. Jeti myńdaı kóshet otyrǵyzdyq. Týǵan jerimizdiń jasyl-jelekke ári jemisi mol ólkege aınalǵanyn qalaımyn. Jumysqa óz aýylymnyń turǵyndaryn aldym. Endi aǵashtardy kútip-baptasaq, keıin jemisin berse, ıgiligin de osy el kóretin bolady», - deıdi E.Bekjanov.
Osylaısha qyzylordalyq kásipkerler, demeýshi azamattar jáne metsenattar týǵan jerdi túletýge belsene atsalysyp keledi. Bul jas urpaqqa úlgi bolarlyq ónegeli iske aınaldy.