Qyzylordada maıdangerlerge 1 mln 111 myń teńgeden beriledi
Soǵys jyldarynda Syr óńirinen maıdanǵa 70 myńǵa jýyq adam attandy. Olardyń teń jarymyna jýyǵy týǵan jerge oralǵan joq. Qazir Qyzylordada 16 qart jaýynger turady. Olardyń 9-y - soǵys ardageri bolsa, 7-i - soǵys múgedegi.
«Uly Otan soǵysynyń ardagerlerine jáne olarǵa teńestirilgen azamattarǵa birjolǵy materıaldyq kómek kórsetýge oblystyq jáne aýdandyq bıýdjetten qarjy bólindi. Onyń ishinde, qatysýshylar men múgedekterine, tylda qajyrly eńbegi men minsiz áskerı qyzmeti jáne keminde 6 aı jumys istegen azamattarǵa, ekinshi ret nekege qurmaǵan, qaıtys bolǵan soǵys múgedekteriniń jáne solarǵa teńestirilgen múgedekterdiń áıelderine áleýmettik tólem tólendi. Sondaı-aq, ardagerlerge dástúrli azyq-túlik sebetteri usynylady»,-dedi oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Talǵat Dúısebaev.
Bul maqsatta jergilikti bıýdjetten 452 mln teńgeden astam qarjy bólindi. Basqarmanyń málimetinshe, bul sanatta 4335 adam bar. Ot pen oqtyń ortasynan esen-saý oralǵan, ortamyzda júrgen 16 qarııaǵa birjolǵy materıaldyq kómek retinde 1 mln 111 myń teńgeden beriledi. Tyldaǵy qajyrly eńbegi jáne minsiz áskerı qyzmeti úshin KSRO ordenderimen, medaldarymen marapattalǵandarǵa – 183 myń, tylda keminde jarty jyl jumys istegenderge, ekinshi ret nekelespegen, qaıtys bolǵan soǵys múgedekteri men olarǵa teńestirilgen múgedekterdiń áıelderine nemese kúıeýlerine 100 myń teńgeden tıesili.
Soǵys surapylyn kórgen tarıh kýágerleri sondaı-aq «Birgemiz» qoǵamdyq qorynan 50 myń teńgeden alady. Jeńisti jaqyndatýǵa eseli eńbegimen eleýli úles qosqan jandarǵa qarjylaı qoldaýdan bólek, Jeńistiń 75 jyldyǵyna arnalǵan medal tabystalady.