Qyzylordada mádenı jáne tarıhı eskertkishterge QR-kod ornatyldy

 QYZYLORDA. QazAqparat - Syr óńirindegi mádenı jáne tarıhı eskertkishterge QR-kod ornatyldy. Endi aımaqqa kelgen meıman ǵalamtor arqyly árbir eskertkish jaıynda jan-jaqty maǵlumat alýyna bolady, dep habarlaıdy QazAqparat tilshisi.

Atalmysh ıgilikti is «Qazaqstannyń kıeli jerleriniń geografııasy» jobasy negizinde qolǵa alynyp otyr. Qazirgi tańda óńirde osyndaı taqtaıshalar  sany 150-ge jetti. Al Qyzylordada 40-qa jýyq.

Oblystyq tarıhı jáne mádenı eskertkishterdi qorǵaý jónindegi kommýnaldyq memlekettik mekemesi  Qorqyt ata kitabynyń 1300 jyldyǵyna arnalǵan eskertkish belginiń basynda jýrnalısterge atalmysh jóninde keńinen áńgimelep berdi. Onda ornatylǵan jańa aqparattyq-tehnologııalyq baǵdarlamanyń paıdalaný erejesi nazarǵa usynyldy.

«QR-kod, ıaǵnı, «Quick Response» qazaq tilinde shuǵyl jaýap degen maǵynany beredi. Bul - mobıldi telefonnyń kamerasy arqyly jyldam taný úshin aqparat beretin eki ólshemdi shtrıh-kod. Onyń kómegimen ınternet jelisin qoldaný múmkindigi bar jerlerde eskertkish týraly kez kelgen málimetti alýǵa bolady. Atalmysh baǵdarlama boıynsha týrıster tek qajetti maǵulmattardy alýmen ǵana shektelmeıdi, sondaı-aq sol orynda erkin baǵdarlap júre alady», - deıdi oblystyq tarıhı jáne mádenı eskertkishterdi qorǵaý jónindegi KMM basshysy Sapar Kózeıbaev.

Tarıhı jáne mádenı eskertkishter jónindegi aqparattar ázirge qazaq jáne orys tilderinde. Keleshekte ol aǵylshyn tilinde de jasalatyn bolady. Sondaı-aq, qala kóshelerindegi aıaldamalarda da sondaı aqparattar beriledi. Ol halyqtyń eskertkishterge degen qyzyǵýshylyǵyn arttyryp, qoljetimdilikti kóbeıte túsedi. 

Eske sala ketsek, munyń aldynda Syǵanaq qalashyǵy týrıstik nysan retinde ashylǵanyn habarlaǵan bolatynbyz.